O'zbekiston Respublikasi suv xo'jaligi vazirligi huzuridagi Suv xo'jaligi obyektlarini ekspluatatsiya qilish agentligi

Mamlakatimizda keyingi yillarda suv resurslaridan oqilona foydalanish, irrigatsiya tarmoqlarining texnik holatini yaxshilash va suv yo‘qotilishini kamaytirishga alohida e’tibor qaratilmoqda. Kanallarni betonlashtirish, gidrotexnika inshootlarini rekonstruksiya qilish va suvni iste’molchilarga barqaror yetkazib berishga qaratilgan yirik loyihalar ana shu sa’y-harakatlarning amaliy natijasidir.

Joriy yilda Andijon viloyatida kanallarni rekonstruksiya qilish va betonlashtirish tadbirlari uchun 152 milliard so‘m mablag‘ yo‘naltirilgan. Jumladan, Vazirlar Mahkamasining 660-sonli qarori doirasida ajratilgan 41,5 milliard so‘m hisobidan 7 ta ob’ektda jami 39,5 kilometr kanallarni rekonstruksiya qilish va betonlashtirish, shuningdek, 1,3 kilometr lotok tarmog‘i qurish ishlari amalga oshirildi.

Bu ishlar natijasida 14,2 ming gektar ekin maydonlarining suv ta’minoti yaxshilanib, yiliga 15,8 million kub metr suvni iqtisod qilish imkoniyati yaratildi.

Ana shu keng ko‘lamli bunyodkorlik ishlarining mantiqiy davomi sifatida Bo‘ston tumanidagi «Shahrixonsoy» kanalining PK-1051 dan PK-1083 gacha bo‘lgan qismi ham tubdan rekonstruksiya qilindi.

Loyiha doirasida kanalning 3,2 kilometr qismi to‘liq betonlashtirildi. Qurilish-montaj ishlarini belgilangan muddatda va sifatli bajarish maqsadida 12 ta maxsus texnika jalb etildi. Loyihaning umumiy qiymati 8,2 milliard so‘mni tashkil etdi.

Rekonstruksiya ishlari «Andijonsuvqurilishinvest» davlat muassasasi buyurtmachiligida, bosh pudratchi «Sahovat unumi» MChJ tomonidan amalga oshirildi.

— Keyingi yillarda suv xo‘jaligi sohasiga bo‘lgan e’tibor tubdan o‘zgardi. Irrigatsiya tarmoqlarini qurish va rekonstruksiya qilish, ayniqsa, kanallarni betonlashtirish uchun davlat budjetidan katta mablag‘lar ajratilmoqda. «Shahrixonsoy» kanalining ushbu qismida amalga oshirilgan ishlar natijasida suv o‘tkazish samaradorligi oshdi, suvning singib ketishi va boshqa yo‘qotishlar kamaydi. Eng muhimi, 9 ming 100 gektar ekin maydonining suv ta’minoti yaxshilanib, yiliga o‘rtacha 3,5 million kub metr suvni tejash imkoniyati yaratildi, — deydi Norin–Qoradaryo irrigatsiya tizimlari havza boshqarmasi boshlig‘i o‘rinbosari Sirojiddin Qurbonov.

Darhaqiqat, «Shahrixonsoy» kanali hududdagi qishloq xo‘jaligi ekin maydonlarini suv bilan ta’minlashda muhim o‘rin tutadi. Kanalning rekonstruksiya qilinishi natijasida uning texnik holati va suv o‘tkazish qobiliyati yaxshilanib, iste’molchilarga suvni o‘z vaqtida va barqaror yetkazib berish uchun yanada qulay sharoit yaratildi.

Beton qoplama suvning tuproqqa singib ketishini kamaytirishi bilan birga, kanaldan foydalanish samaradorligini ham oshiradi. Bu esa suv tanqisligi tobora sezilayotgan bugungi sharoitda har bir kub metr suvni asrab-avaylab ishlatish nuqtai nazaridan g‘oyat muhimdir.

— Bu kabi ezgu va xayrli ishlar nafaqat qishloq xo‘jaligida mahsuldorlikni oshirishga, balki suv resurslarini tejash va ularni kelgusi avlodlarga bezavol yetkazishga ham xizmat qiladi. Kanalning yangilanganini ko‘rib, aholi va dehqonlarning ko‘ngli to‘ldi, — deydi  Shahrixon tumani Qo‘rg‘oncha MFY Fayzobod ko‘chasida yashovchi Abdumannop Ismanov.

Obyektning belgilangan muddatda foydalanishga topshirilishida quruvchilar, muhandislar, loyihachilar va suv xo‘jaligi xodimlarining fidokorona mehnati mujassam. Ularning sa’y-harakatlari tufayli hududda suv ta’minoti barqarorligi yanada mustahkamlandi.