Xurshid Hamrayev “Eng yaxshi suvchi kitobxon” tanlovi Agentlik bosqichi g‘olibi
2026-08-19 14:15:00 / Yangiliklar
Unda Agentlikning markaziy apparatida faoliyat yurituvchi 7 nafar xodim uchta shart bo‘yicha bellashdi.
Tanlov avvalida Agentlik direktorining birinchi o‘rinbosari Ilhom Jo‘rayev so‘zga chiqib, kitob mutolaasi insonning dunyoqarashi va tafakkurini boyitish, kasbiy hamda intellektual salohiyatini oshirishda muhim o‘rin tutishini ta’kidladi. Shuningdek, soha xodimlari o‘rtasida kitobxonlik madaniyatini yuksaltirish, adabiy asarlarning hayotimizdagi o‘rni va ahamiyatini targ‘ib qilish, mutolaaga qiziqishni kuchaytirish tanlovning asosiy maqsadlaridan ekani qayd etildi.
Shundan so‘ng ishtirokchilar “O‘zbek adabiyoti bilimdoni”, “Sohaga oid asarlar bilimdoni” hamda “Men sevib o‘qigan motivatsion asar” shartlari bo‘yicha bellashdilar. Birinchi shartda ishtirokchilar badiiy asar qahramonlari haqidagi savollarga javob berib, berilgan parchaning qaysi asardan olinganini aniqladi. Ikkinchi shartda suv ilmi va sohaga oid adabiyotlar bo‘yicha bilimlari sinovdan o‘tkazildi. Uchinchi shartda esa tanlangan motivatsion asarning g‘oyasi, mazmuni va undan chiqarilgan xulosalar esse orqali yoritildi.
Kitobxonlar hakamlar tomonidan javoblarining to‘g‘riligi, asar mohiyatini anglashi, fikrni ifodalash uslubi, savodxonlik va asarga munosabat bildirish qobiliyatiga qarab baholab borildi.
Yakuniy natijalarga ko‘ra, Axborot-tahlil bo‘limi bosh mutaxassisi Xurshidjon Hamrayev birinchi o‘rinni egallab, tanlovning respublika bosqichiga yo‘llanmani qo‘lga kiritdi. Shuningdek, Nasos stansiyalari va energetika boshqarmasi yetakchi mutaxassisi Mohira Abdukarimova ikkinchi, Suv yetkazib berish xizmatlari faoliyatini muvofiqlashtirish boshqarmasi bosh mutaxassisi Umid Axmedov esa uchinchi o‘ringa munosib deb topildi.
G‘olib va sovrindorlar diplom hamda esdalik sovg‘alari bilan taqdirlandi.