"Karera kuni": Andijonda 10 nafar yosh mutaxassis suv xo‘jaligi tizimida ish boshladi
2026-07-25 18:40:00 / Yangiliklar
Mazkur vazifalar ijrosini ta’minlash maqsadida hududlarda oliy ta’lim muassasalari bitiruvchilari uchun «Karera kunlari» tashkil etilmoqda.
Norin–Qoradaryo irrigatsiya tizimlari havza boshqarmasida o‘tkazilgan navbatdagi mehnat yarmarkasida Andijon qishloq xo‘jaligi va agrotexnologiyalar instituti hamda Andijon davlat texnika institutining 80 nafardan ortiq bitiruvchisi ishtirok etdi.
Tadbirda yoshlarga suv xo‘jaligi tizimidagi bo‘sh ish o‘rinlari, mehnat sharoitlari, xizmat vazifalari, ishga qabul qilish tartibi va kasbiy rivojlanish imkoniyatlari haqida ma’lumot berildi. Bitiruvchilar tizim tashkilotlari rahbar va mutaxassislari bilan bevosita suhbatdan o‘tib, o‘z bilim va ko‘nikmalarini namoyish etdi.
Yarmarka mobaynida Odiljon Otaxonov, Islomjon Rahimov, Mubina Qozimova, Abduvahhob Iqbolov, Akrom Jo‘raboyev va Mirzabek Ikromjonov kabi 10 nafar yoshlar o‘z mutaxassisligi bo‘yicha ishga qabul qilinib, mehnat shartnomalari tuzildi.
— Bugungi “Karera kuni”da bo‘sh ish o‘rinlari va mehnat sharoitlari haqida batafsil ma’lumot oldik, mutaxassislar bilan bevosita suhbatlashdik. Suhbat yakunida meni Nasos stansiyalari va energetika boshqarmasiga ishga qabul qilishdi. Menga ishonch bildirilganidan bag‘oyatda xursandman. Kelgusida o‘z bilim va mehnatim bilan suv xo‘jaligi rivojiga hissa qo‘shishga harakat qilaman, — dedi Mubina Kozimova.
Norin-Qoradaryo irrigatsiya tizimlari havza boshqarmasi boshlig‘ining birinchi o‘rinbosari Shuhratbek Ergashevning ta’kidlashicha, ayni paytda tizimda xodimlarning ma’lumoti va malakasini egallab turgan lavozimi talablariga muvofiqlashtirish ishlari ham davom etmoqda.
Malaka talablariga javob bermagan 103 nafar xodimning 82 nafari ma’lumoti va mutaxassisligiga mos lavozimlarga joylashtirildi, - deydi Shuhratbek Ergashev. - Qolgan 21 nafar xodimning malaka talablariga muvofiqligini ta’minlash bo‘yicha tegishli ishlar olib borilmoqda.
“Karera kunlari” bitiruvchilar bandligini ta’minlash bilan birga, suv xo‘jaligi tizimini oliy ma’lumotli, zamonaviy bilim va ko‘nikmalarga ega yosh kadrlar bilan bosqichma-bosqich to‘ldirishga xizmat qilmoqda.