❗️ Lalmi va yaylov yerlarini foydalanishga kiritishning yangi tartibi belgilandi
2026-07-15 15:55:00 / Yangiliklar
Farmonga muvofiq, Qoraqalpog‘iston Respublikasi Vazirlar Kengashi va viloyatlar hokimliklari har yili foydalanishga kiritiladigan yer uchastkalari bo‘yicha dasturlarni tasdiqlaydi. Ushbu hududlar uchun yer tuzish loyihasi va texnik-iqtisodiy asos ishlab chiqiladi.
Texnik-iqtisodiy asosda yer uchastkasini foydalanishga kiritishning har bir bosqichida amalga oshiriladigan ishlar, mas’ullar, muddatlar, xarajatlar va moliyalashtirish manbalari, loyihaning samaradorligi hamda davlat tomonidan taqdim etiladigan qo‘llab-quvvatlash choralari aniq belgilanadi.
Tayyorlangan yer uchastkalari yer tuzish loyihasi va texnik-iqtisodiy asos bilan birgalikda «E-auksion» elektron savdo platformasi orqali auksionga chiqariladi.
Yana bir muhim jihat: yer uchastkasini foydalanishga kiritish muddati u belgilangan tartibda ajratilgan kundan boshlab ko‘pi bilan ikki yil etib texnik-iqtisodiy asosda belgilanadi.
Mazkur yangi tartib yerlarni foydalanishga kiritish ishlarini oldindan puxta rejalashtirish, zarur infratuzilma va resurslarga bo‘lgan ehtiyojni aniq hisob-kitob qilish hamda loyihalarni iqtisodiy samaradorlik asosida amalga oshirish imkonini beradi.