Latviyalik mutaxassislar Bo‘stonliqda suv tejovchi texnologiyalar tajribasi bilan tanishdi
2026-07-14 14:10:00 / Yangiliklar
Delegatsiya a’zolari dastlab «Bo‘stonliq Kartoshkachilik markazi» MCHJda bo‘ldi. Bu yerda serhosil kartoshka navlarini yetishtirish va saqlash, takroriy ekinlar uchun yer tayyorlash, shuningdek, kartoshka va boshqa qishloq xo‘jaligi ekinlarini zamonaviy sug‘orish texnologiyalari asosida parvarishlash jarayonlari haqida ma’lumot berildi.
Ma’lum qilinishicha, joriy yilda xo‘jalikning 600 gektar g‘alla maydonida yomg‘irlatib sug‘orish texnologiyasi qo‘llanilgan. Yana 300 gektar maydonda kartoshka va boshqa ekinlar tomchilatib sug‘orilmoqda. Bu orqali suvni ekin maydonlariga belgilangan me’yorda yetkazib berish va suv resurslaridan samarali foydalanish imkoni yaratilgan.
Shuningdek, delegatsiya «Escalodo Business» MCHJda 50 gektar maydonda yetishtirilayotgan malina, qulupnay va qorag‘at ko‘chatlarini tomchilatib sug‘orish jarayoni bilan tanishdi. Xorijlik mutaxassislar suv resurslaridan tejamkor foydalanish va zamonaviy sug‘orish texnologiyalarini amaliyotga tatbiq etish bo‘yicha to‘plangan tajribaga yuqori baho berdi.