«Sel-toshqin suvlaridan samarali foydalanishni ta’minlash chora-tadbirlari to‘g‘risida»gi qaror sharhi
2026-05-29 09:30:00 / Yangiliklar
Qarorda sel-toshqin suvlaridan samarali foydalanishni ta’minlashning asosiy maqsadli ko‘rsatkichlari belgilangan.
Bular:
- 2027 yildan boshlab respublika hududlarida 5 ta sel-suv omborlarini qurish;
- sel-suv omborlarini qurish hisobiga:
- Samarqand viloyatida 7 ming gektar, Toshkent viloyatida 2 ming gektar va Jizzax viloyatida 300 gektar yer maydonlarining suv ta’minotini yaxshilash;
- Samarqand viloyatida 3,3 ming gektar va Toshkent viloyatida 300 gektar yangi yerlarni o‘zlashtirish.
Suv xo‘jaligi vazirligi, viloyatlar hokimliklari, “Agrobank” ATB hamda Irrigatsiya va suv muammolari ilmiy-tadqiqot instituti hamkorligida ilmiy tavsiya va xulosalar asosida respublika bo‘yicha kichik suv zaxiralarini barpo qilish imkoniyati mavjud 60 ta hudud aniqlangan.
Qaror bilan 2027–2030-yillarda quriladigan sel-suv omborlarining manzilli dasturi tasdiqlandi.
Shu bilan birga, qarorda belgilanishicha, sel-suv ombori va uning inshootlari, karerlar va qurilish maydoniga tushgan yer uchastkalari qonunchilik hujjatlarida belgilangan tartibda jamoat ehtiyojlari uchun olib qo‘yiladi. Bunda, jismoniy va yuridik shaxslarga yetkazilgan mulkiy zararlar qonunchilikda belgilangan tartibda qoplab beriladi.
Suv xo‘jaligi vazirligi Iqtisodiyot va moliya vazirligi bilan birgalikda Jizzax viloyati Baxmal tumanidagi “Tangatopdisoy” va Toshkent viloyati Bo‘stonliq tumanidagi “Oqsoqotasoy” sel-suv omborlari qurilishini “Agrobank” ATB buyurtmachiligida ishlab chiqilgan loyihaoldi hujjatlariga muvofiq davlat-xususiy sheriklik shartlari asosida amalga oshirish choralari ko‘radi.
Qurilgan sel-suv omborlari Suv xo‘jaligi vazirligi tizimidagi foydalanuvchi tashkilotlar balansiga beg‘araz topshiriladi.
Sel-suv omborlari xususiy sherik hisobidan quriladi. Xususiy sherik uchun:
- sel-suv omborlari himoya zonalarida belgilangan tartibda tasdiqlangan master-reja asosida turistik-rekreatsion zonalarini tashkil etishga;
- ushbu hududlar 49-yilga keyinchalik uzaytirish sharti bilan foydalanish uchun to‘lovsiz asosda berilishiga;
- sel-suv omborlari suv havzasida baliqchilik xo‘jaligini tashkil etishga hamda inshootlar xavfsizligiga ta’sir qilmaydigan boshqa daromad keltiruvchi faoliyat bilan shug‘ullanishga ruxsat beriladi.
Davlat sherigi sifatida sel-suv omborlarini saqlash hamda ulardagi suv resurslarini boshqarish Suv xo‘jaligi vazirligi tomonidan amalga oshiriladi.
Ushbu hujjatlar suv fondi yerlaridan qo‘shimcha iqtisodiy samara olish va yangi ish o‘rinlarini yaratish, qishloq xo‘jaligi mahsulotlarini yetishtirish ko‘lamini yanada oshirish, shuningdek, hududlarda bahor-yoz mavsumidagi sel-toshqin suvlaridan samarali foydalanishni tashkil etishga xizmat qiladi.
Mazkur qaror respublikamiz hududlarida bahor-yoz mavsumidagi sel-toshqin suvlaridan samarali foydalanish, shuningdek, qo‘shimcha yer maydonlarini o‘zlashtirish orqali yangi ish o‘rinlarini yaratish hamda qishloq xo‘jaligi mahsulotlarini yetishtirish ko‘lamini yanada oshirishga xizmat qiladi.