Qashqadaryo viloyati Shahrisabz shahar Hokimligi

Assalomu alaykum, hurmatli mahalla tizimi xodimlari! Sizlarni an’anaviy bayramingiz bilan Shahrisabz shahar hokimligi, shahar kengashi deputatlari, hamkor tashkilotlar, faollar va hamshaharlarimiz nomidan chin qalbimdan samimiy muborakbod etaman. Qadimiy va hamisha navqiron Shahrisabz- Kesh shahrining bugungi istiqboli va kelajagini yaratishda mahalla tizimi xodimlarining xizmatlari beqiyosdir. Ne-ne allomalar yetishib chiqqan ushbu muqaddas zamindagi mahallalarning qiyofasini yanada obod qilish, aholi ertangi kunga bo‘lgan ishonchini mustahkamlash oldimizda turgan eng ustuvor vazifalardandir. Biz birgalikda aholining baxtli va farovon hayot kechirishi yo‘lida Prezidentimiz tomonidan ilgari surilgan tashabbuslarning ijrosini ta’minlashda qat’iyat va sobitqadamlik bilan faoliyat olib bormoqdamiz. Erishilgan yutuqlar bilan birga, mahalla tizimida hali oldimizda turgan muhim vazifalar ham mavjud. Aholi turmush farovonligini oshirish borasida amalga oshirilayotgan islohotlar natijasida bugun ko‘plab fuqarolarimiz yorug‘, ko‘rkam va shinam xonadonlarda baxtli hayot kechirmoqda. Jumladan, 2025-yilda renovatsiya dasturi hamda xususiy sektorlar tomonidan 26 ta, jami 904 xonadonli ko‘p qavatli uy-joylar foydalanishga topshirildi. 2026-yil yakuniga qadar esa yana 20 ta, 1500 xonadonli ko‘p qavatli uy-joylar qurilib, foydalanishga topshirilishi rejalashtirilgan.Bundan tashqari, joriy yilda 54 ta ko‘p qavatli uylarda mukammal va joriy ta’mirlash ishlari amalga oshiriladi. “Tashabbusli byudjet” dasturining 2025-yilgi mavsumlari doirasida Katta Novqat (6,4 km), Uymovut (3,5 km), Namaton (2,9 km), Qorasuv (3100 metr), Barhayot (3156 metr), Kesh (3156 metr), Oqsaroy (3156 metr), Zargarlik (6312 metr), Sinabog‘ (3156 metr) mahallalarida ichki yo‘llar to‘liq asfaltlashtirilib, aholiga foydalanishga topshirildi. Pillakashlik mahallasi esa tanib bo‘lmas darajada yangilandi. Yashil diyor, Choshtepa hududlarida ham bunyodkorlik ishlari davom etmoqda. Shuningdek, Uymovut va Sinabog‘ mahallalarida yangi loyihalar amalga oshirilishi rejalashtirilgan. 2026-yil davlat dasturi doirasida jami 9,0 km ichki yo‘llar asfaltlashtiriladi. Ayni paytda shahardagi 38 ta mahallaning 75 foizi markazlashgan ichimlik suvi bilan ta’minlangan bo‘lsa, qolgan 25 foizi artezian quduqlar orqali suvdan foydalanmoqda. Aholini to‘liq ichimlik suvi bilan ta’minlash maqsadida 2026-yilda “O‘rta shaharlarni kompleks rivojlantirishni qo‘shimcha moliyalashtirish” loyihasi asosida Zargarlik, Sariosiyo, Choshtepa, Namaton, Guliston, Qorasuv, Uymovut, Katta Novqat, Bunyodkor, Yashil diyor, Yangi hayot, Sinabog‘ va Oqsaroy mahallalari hududidan o‘tuvchi 27,4 km uzunlikdagi yangi ichimlik suvi tarmog‘ini ishga tushirish rejalashtirilgan. Hozirda loyiha ishlari olib borilmoqda. Navro‘z bayrami kuni bir necha yillardan buyon nosoz, yaroqsiz holga kelib qolgan Fayzobod mahallasiga qarashli Olimjon Komilov ko‘chasining 1,5 km qismiga asfalt yotqizilib, foydalanishga topshirildi. Ishonchim komilki, yil yakuniga qadar ushbu ezgu ishlarimiz ham aholimiz xursandchiligi bilan yakunlanadi. Bugungi yangilanish va taraqqiyot ruhi hukm surayotgan shu fayzli kunlarda mahallalar infratuzilmasini yanada yaxshilash, aholiga qulay va xavfsiz sharoit yaratish ustuvor vazifamiz bo‘lib qoladi. Fursatdan foydalanib, yurtimiz farovonligi, shahrimiz rivoji yo‘lida sidqidildan mehnat qilayotgan barcha mahalla tizimi xodimlarini, raislarni va “yettilik” a’zolarini yana bir bor chin qalbimdan tabriklayman. Sizlarga sihat-salomatlik, oilaviy baxt va sharafli faoliyatingizda ulkan zafarlar tilayman. Hurmat va ehtirom bilan, Sherzod Bo‘riyev Shahrisabz shahar hokimi