Oʻzbekiston - Janubiy Koreya: pensiya taʼminoti sohasida hamkorlik mustahkamlanadi
2025-12-13 14:45:00 / Jamg'arma yangiliklari
Joriy yilning 11-12-dekabr kunlari Toshkent shahrida Pensiya jamgʻarmasi rahbariyati va Koreya Respublikasi Sogʻliqni saqlash va ijtimoiy taʼminot vazirligi hamda Milliy Pensiya Xizmati delegatsiyasi vakillari oʻrtasida pensiya taʼminoti sohasida hamkorlikni rivojlantirish boʻyicha muzokaralar boʻlib oʻtdi.
Uchrashuvda Pensiya jamgʻarmasi ijro etuvchi direktori M.Atadjanov, Koreya Respublikasi Sogʻliqni saqlash va ijtimoiy taʼminot vazirligi direktori oʻrinbosari Cho Yon He, Milliy Pensiya xizmati vakili Kvon Ki Djun hamda tomonlardan soha mutaxassislari oʻz fikr-mulohazalari bilan ishtirok etdi.
Uchrashuv davomida Oʻzbekiston va Janubiy Koreyaning pensiya taʼminoti tizimi, asosiy vazifa va maqsadlari, sohada amalga oshirilayotgan izchil islohotlar toʻgʻrisida suhbatlashildi.
Bunda ikki davlat fuqarolarining pensiya taʼminotini olishda mavjud muammolar, ularni bartaraf etishga oid masalalarga alohida eʼtibor qaratildi.
Oʻzaro muloqot yakunida tomonlar "Oʻzbekiston Respublikasi va Koreya Respublikasi oʻrtasida ijtimoiy taʼminot toʻgʻrisida bitimni amalga oshirish boʻyicha vakolatli organlar va vakolatli agentliklar oʻrtasida muzokaralarning kelishuv bayonnomasi"ni imzoladi. Mazkur hujjat ikki davlat oʻrtasidagi pensiya sohasida hamkorlikni yanada mustahkamlashi bilan ahamiyatlidir.
Uchrashuv yakunida kelgusida ham oʻzaro muloqotni davom ettirish, pensiya taʼminoti boʻyicha oʻzaro tajriba almashish hamda uni amaliyotga qoʻllashga kelishib olindi.