Oʻzbekistonda pensiya tizimini moliyaviy barqarorligini baholash va uni yanada takomillashtirish maqsadida xalqaro tashkilotlar koʻmagida aktuar baholash jarayoni amalga oshiriladi.

Xalqaro mehnat tashkilotining koʻmagi asosida BMTning Global akselerator tashabbusi va Jahon Bankining “Kompas” dasturi doirasida Oʻzbekiston uchun “Pensiya va ijtimoiy sugʻurta islohotlarini amalga oshirish hamda institutsional salohiyatni mustahkamlash” loyihasi doirasida grant ajratiladi.

Loyiha Iqtisodiyot va moliya vazirligi rahbarligida, YUNISEF va Jahon banki grant mablagʻlari hisobiga 2 yil davomida amalga oshiriladi. Unda Xalqaro mehnat tashkilotining ijtimoiy taʼminot tizimlarini aktuar baholash modelidan foydalanish nazarda tutilgan.

Loyiha natijasida Oʻzbekistonda pensiya tizimining amaldagi qoidalari moliyaviy jihatdan qay darajada barqaror ekani aniqlanadi. Shu orqali kelgusidagi ehtimoliy moliyaviy tavakkalchiliklar oldindan baholanib, tizimni yanada samaraliva adolatli qilish boʻyicha ilmiy asoslangan qarorlar qabul qilinishi mumkin boʻladi.

Mazkur grant asosida amalga oshiriladigan aktuar baholash pensiya tizimining uzoq muddatli barqarorligi va kelajak avlodlar manfaatini taʼminlashga xizmat qiladi.