O‘zbekiston va Mo‘g‘uliston qo‘shma iqtisodiy komissiyasining birinchi yig‘ilishi

Dastlab ikki davlat delegatsiyalari rahbarlarining: Oʻzbekiston tomonidan Oʻzbekiston Respublikasi Bosh vazirining oʻrinbosari Jamshid Xoʻjayev va Moʻgʻuliston tomonidan Davlat Buyuk Xurali aʼzosi, Hukumat aʼzosi, Bosh vazir oʻrinbosari Sainbuyan Amarsaixanlarning ikki tomonlama uchrashuvi boʻlib oʻtdi.

Uchrashuvda ikki davlat oʻrtasidagi munosabatlarning bugungi holati va uni rivojlantirish istiqbollari atroflicha koʻrib chiqilib, oʻzaro savdo koʻrsatkichlari, sarmoyalarni jalb etish va sanoat kooperatsiyasi boʻyicha aniq maqsadlar belgilab olindi.

Xususan, O‘zbekiston bilan Mo‘g‘uliston o‘rtasidagi tovar ayirboshlash hajmi o‘tgan yil yakuniga ko‘ra qariyb 50 foizga oshgani, joriy yilda ham ijobiy tendentsiya barqaror saqlanib qolayotgani qayd etildi.

Yengil avtomobillar, oziq-ovqat mahsulotlari va elektr jihozlari yetkazib berishda sezilarli o‘sish kuzatildi.

Ayni paytda Mo‘g‘uliston kompaniyalari O‘zbekiston hududlarida chorvachilik, geologiya, moliya va tibbiyot sohalarida loyihalarni amalga oshirmoqda.

Tomonlar kelgusidagi hamkorlikni rivojlantirishning ustuvor yo‘nalishlarini belgilab, O‘zbekiston Respublikasi va Mo‘g‘uliston o‘rtasidagi savdo-iqtisodiy va ilmiy-texnikaviy hamkorlikni rivojlantirish bo‘yicha Hukumatlararo komissiyaning 1-yig‘ilishi doirasida muzokaralarni davom ettirdilar.

Yig‘ilishda tegishli vazirlik, idora va tarmoq birlashmalari rahbarlarining amaldagi kelishuvlar ijrosi yuzasidan hisobotlari tinglandi. Loyihalarning har bir bosqichi atroflicha tahlil qilinib, ularni muvaffaqiyatli amalga oshirishni jadallashtirish bo‘yicha samarali yechimlar ishlab chiqildi, muddatlar hamda mas’ul shaxslar belgilab olindi.

Tadbirlar dasturi ikki mamlakatning 150 dan ortiq yirik kompaniyalari rahbarlari ishtirokidagi biznes-forum va ishbilarmonlar kengashining ta’sis yig‘ilishi bilan davom etdi.

Forumda Mo‘g‘uliston tomonidan Dornod meat market, Sodon Oil Trade, IATA, MONGOL BAZALT, Tsaramtainarvai, Ikh Dodizul Energy, Azipharma, Jargalant, Kapitron Bank, Mandal insurance sug‘urta va boshqa kompaniyalar rahbarlari ishtirok etdi.

Bosh vazir o‘rinbosari Jamshid Xodjayev o‘z qutlov so‘zida ishbilarmon doiralar o‘rtasidagi o‘zaro hamkorlikni faollashtirish, mintaqaviy bozorlar sig‘imi va transport-logistika imkoniyatlarini chuqur tahlil qilish asosida savdo aloqalarini tubdan kengaytirish muhimligini ta’kidladi.

Biznes-forumda O‘zbekiston hududlari va iqtisodiyot tarmoqlari imkoniyatlari, tog‘-kon sanoati, qishloq xo‘jaligi, turizm, energetika va boshqa sohalarni rivojlantirish bo‘yicha aniq investisiya tashabbuslari va loyihalari taqdim etildi.

Shuningdek, O‘zbekistonda tadbirkorlarning qulay faoliyat yuritishi, huquq va manfaatlarini himoya qilish uchun yaratilgan shart-sharoitlar, mamlakatimiz sarmoyaviy va sanoat salohiyatining muhim jihatlari haqida so‘z yuritildi.

Dastur B2B va B2G uchrashuvlari bilan davom etdi. Unda tadbirkorlar yangi, foydali aloqalar o'rnatishlari hamda o'zaro manfaatli loyihalar va savdo kelishuvlarini birgalikda amalga oshirish tafsilotlarini muhokama qilishdi.

Tadbirlar yakunlari bo‘yicha O‘zbekiston-Mo‘g‘uliston hukumatlararo qo‘shma komissiyasining 1-majlisi bayonnomasi hamda bir qator ikki tomonlama shartnomalar, jumladan, Toshkent davlat agrar universiteti va Mo‘g‘uliston hayot fanlari universiteti o‘rtasida ta’lim sohasiga oid kelishuvlar imzolandi.