Samarqand va Belarus o‘rtasida investitsiya va sanoat sohalarida hamkorlik kengaymoqda

Minskda «Belinvestbank» va Belarus Qishloq xo‘jaligi vazirligi vakillari bilan uchrashuvlar o'tkazildi, unda investitsiya va ishbilarmonlik hamkorligini kengaytirish, chorvachilik, to‘qimachilik, oziq-ovqat sanoati, qishloq xo‘jaligini qayta ishlash, turizm va sog‘liqni saqlash sohalarida qo‘shma loyihalarni rivojlantirish masalalari muhokama qilindi. Belarus tomoni moliyalashtirish, imtiyozli kredit va lizing imkoniyatlarini taqdim etdi.

Shuningdek, naslli qoramollarni yetkazib berish, go‘sht mahsulotlari importi, seleksiya-genetika sohalarida hamkorlik, chorvachilik majmualariga investitsiya kiritish ham ko‘zda tutilmoqda. Sut mahsulotlari ishlab chiqarish, bolalar oziq-ovqatlarini mahalliylashtirish, mevalar va qayta ishlangan mahsulotlarni eksport qilish, qishloq xo‘jaligi texnikasi yetkazib berish bo‘yicha hamkorlik yo‘lga qo‘yildi.

To‘qimachilik sohasida esa Belarus bilan matolar va uskunalarni yetkazib berishdan to‘liq ishlab chiqarish kooperatsiyasiga qadar chuqur integratsiya rejalashtirilmoqda. Samarqandda 600 dan ortiq korxona 16 ming mutaxassis bilan faoliyat yuritmoqda, ishlab chiqarish hajmi yillik 5% o‘sishni ko‘rsatmoqda. Endi asosiy maqsad – mavjud salohiyatni qo‘shma mahsulotlarga aylantirish, Belarus brendlari ostida ishlab chiqarish, uskunalar va raqamlashtirish texnologiyalarini joriy etishdir.

Uchrashuvlar natijasida tomonlar o‘zaro manfaatli hamkorlikni kengaytirishga va barcha bosqichlarda to‘liq qo‘llab-quvvatlashga tayyor ekanliklarini bildirib, qo‘shma investitsiyaviy loyihalarni amalga oshirish bo‘yicha kelishuvlarga erishdilar.