Iyul oyida mamlakatimizdagi quyosh va shamol elektr stansiyalari tomonidan 1 mlrd 246 mln kVt⋅soat elektr energiyasi ishlab chiqarildi — yangi rekord ko‘rsatkich
2025-08-04 12:00:00 / Yangiliklar
O‘zbekistondagi quyosh va shamol elektr stansiyalari tomonidan 2025-yil iyul oyida ishlab chiqarilgan elektr energiyasi miqdori bugungi kungacha rekord natijani – 1 mlrd 246 mln kVt⋅soatni tashkil qildi. Bu oy davomidagi jami generatsiyaning 17 foizi, deganidir.
Aytish joizki, bugungi kunda yurtimizda umumiy quvvati 4119 megavatt bo‘lgan 11 ta quyosh fotoelektr stansiyasi va 4 ta shamol elektr stansiyasi “yashil” energiya ishlab chiqarmoqda.
Ta’kidlash kerakki, iyul oyida mazkur stansiyalar tomonidan 1 mlrd 246 mln kVt⋅soat elektr energiyasi ishlab chiqarilgani mamlakatimiz energetika tizimi uchun yangi rekord natijadir.
Eslatib o‘tamiz, bundan avval joriy yil may oyida quyosh va shamol elektr stansiyalari orqali ishlab chiqarilgan elektr energiyasi hajmi 1 mlrd 104 mln kVt·soatni tashkil qilib, oy davomidagi ilk rekord natija qayd etilgan edi (iyul oyida ishlab chiqarilgan elektr energiyasi esa may oyidagidan 142 mln kVt·soat ko‘pni tashkil qildi).
Zero, qayta tiklanuvchi energiya manbalaridan keng foydalanila boshlangan 2022-yili ikkita quyosh fotoelektr stansiyasi tomonidan yil davomida jami 434 mln kVt⋅soat, 2023-yilda esa jami 576,9 mln kVt⋅soat elektr energiyasi ishlab chiqarilgan edi.
O‘tgan yili respublikamizdagi quyosh va shamol elektr stansiyalari tomonidan ishlab chiqarilgan jami elektr energiyasi hajmi 4 mlrd 860 mln kVt·soatni tashkil qilgandi.
Aytish joizki, iyul oyidagi mazkur generatsiyaning 760,9 mln kVt⋅soatlik qismi quyosh elektr stansiyalari tomonidan, 485,4 mln kVt⋅soatlik qismi esa shamol elektr stansiyalari tomonidan ishlab chiqarildi.
Buning natijasida:
➖ 377,5 mln kub metr tabiiy gaz tejalishiga erishildi;
➖ atmosferaga 1 mln 120 ming tonna zararli gazlarning chiqishi oldi olindi.
Qolaversa, iyul oyida O‘zbekistondagi barcha quyosh, shamol va gidroelektr stansiyalari tomonidan 2 mlrd 89 mln kVt·soat elektr energiyasi ishlab chiqarildi. Bu oy davomidagi jami generatsiyaning 27 foizini tashkil qiladi.
Buning natijasida:
➖ 633 mln kub metr tabiiy gaz tejalishiga erishildi;
➖ atmosferaga 1 mln 880 ming tonna zararli gazlarning chiqishi oldi olindi.
Ma’lumot uchun: mazkur hajmdagi elektr energiyasi 1 million 492 ming xonadonning yetti oylik yoki 870 ming xonadonning bir yillik me’yoriy bazasini tashkil qiladi.
Eslatib o‘tamiz, 2025-yil 2-avgust kuni yil boshidan beri quyosh va shamol elektr stansiyalari tomonidan ishlab chiqarilgan jami elektr energiyasi miqdori 6 mlrd kVt⋅soatdan o‘tdi.