Toshkentda “Elektr energetika rivojida xalqaro moliya institutsiyalari va mahalliy korxonalar hamkorligi” mavzusida anjuman o‘tkazildi
2025-07-25 18:55:00 / Yangiliklar
Unda Energetika vazirligi, Iqtisodiyot va moliya vazirligi, “O‘zbekiston milliy elektr tarmoqlari” AJ, Xitoyning “Shandong Electrical Engineering & Equipment Group Co., Ltd.” kompaniyasi, Osiyo taraqqiyot banki, Jahon banki, Yevropa tiklanish va taraqqiyot banki hamda energetika sohasida faoliyat yuritayotgan tashkilotlar rahbariyati va mas’ullari ishtirok etdi.
Tadbir doirasida elektr energetika sohasida xalqaro moliya institutlari tomonidan moliyalashtirilayotgan loyihalarga mahalliy ishlab chiqaruvchilar va pudrat tashkilotlarni jalb etish, investitsiyaviy hamkorlikni rivojlantirish, natijaga asoslangan moliyalashtirish mexanizmlari – “RBL” va “PforR” kabi instrumentlar bo‘yicha tajriba almashish, shuningdek, energetika infratuzilmasini rivojlantirishdagi istiqbollar bo‘yicha fikr almashildi.
Mazkur tadbir quyidagi yo‘nalishlarda muloqot va hamkorlikni chuqurlashtirishga xizmat qiladi:
🔹Elektr tarmoqlarini modernizatsiya qilishda xalqaro moliya institutlari ishtirokining ahamiyati;
🔹Mahalliy kompaniyalarning amaldagi va istiqbolli loyihalardagi ishtiroki;
🔹“Shandong Electrical Engineering & Equipment Group” kompaniyasining faoliyati;
🔹“Zafar” va “Fayzobod” 220 kV podstansiyalarida amalga oshiriladigan loyihalar qurilishiga start berish tashabbuslari.
Magistral elektr tarmoqlari va podstansiyalarni rivojlantirish, modernizatsiya hamda rekonstruksiya qilish maqsadida xalqaro moliya institutlari bilan hamkorlikda 19 ta investitsiya loyihasi amalga oshirilayotgan bo‘lib, jami 2 385 km elektr uzatish tarmoqlari qurish va 8 062 MVA (megavolt amper) quvvat yaratish rejalashtirilgan.
Ushbu ishlarning amalga oshirishi — yurtimiz elektr energetika tarmog‘ini barqaror rivojlantirish, mahalliy salohiyatni mustahkamlash va xalqaro hamkorlikni yangi bosqichga olib chiqishda muhim ahamiyat kasb etadi.