Toshkent shahrining Sergeli tumanida yangi kogeneratsiya qurilmasi ishga tushirilmoqda
2025-04-02 16:30:00 / Yangiliklar
Iste’molchilarni barqaror issiqlik va elektr energiyasi bilan ta’minlash maqsadida «Issiqlik elektr stansiyalari» AJ Toshkent shahrida zamonaviy kogeneratsiya texnologiyalarini joriy etish ishlarini davom ettirmoqda. Hozirgi vaqtda poytaxtning Sergeli tumanidagi O‘zgarish mahallasidan joy olgan yangi kogeneratsiya uskunasida sinash va ishga tushirish ishlari olib borilmoqda.
Loyiha Turkiyaning Iltekno kompaniyasi bilan hamkorlikda amalga oshirilmoqda. Yangi qurilma bir vaqtning o‘zida 2,3 MVt elektr energiyasi va 11 Gkal issiqlik energiyasi ishlab chiqaradi. Hozirgi kunda qurilish-montaj ishlari 98 foiz yakunlangan.
Loyiha doirasida Germaniyada ishlab chiqarilgan yuqori samarador va zamonaviy uskunalar — gaz-porshenli agregat va ikki dona Bosch isitish qozoni o‘rnatilgan. Bu uskunalar yordamida yiliga 220 ming kub metr tabiiy gaz tejaladi hamda havoga chiqariladigan zararli moddalar miqdori kamayishi ta’minlanadi.
Uskuna ishga tushirilgandan so‘ng har yili 18,4 million kVt·soat elektr energiyasi va 46 ming Gkal issiqlik energiyasi ishlab chiqariladi. Loyihani aprel oyida to‘liq ishga tushirish rejalashtirilgan.
Ushbu kogeneratsiya inshooti orqali 51 ta ko‘p qavatli uy, bitta maktab va maktabgacha ta’lim muassasasi, bir ijtimoiy soha obyekti hamda hududdagi tadbirkorlik subyektlari barqaror issiqlik va elektr energiyasi bilan ta’minlanadi.
Ma’lumot uchun: Vazirlar Mahkamasining 2023-yil 20-yanvardagi 23-sonli qaroriga asosan, «Issiqlik elektr stansiyalari» AJ Toshkent shahridagi issiqlik ta’minoti tizimining chekka nuqtalaridan joy olgan 11 ta mahallada kogeneratsiya texnologiyalarini joriy etish loyihalarini amalga oshirmoqda. Xususan, bunga qadar Chilonzor va Olmazor tumanlarida bunday qurilmalar muvaffaqiyatli ishga tushirilgan.