O‘zbekiston, Tojikiston va Qirg‘izistonning mustaqil rivojlanish tarixida ilk bor uch mamlakat davlat chegaralarining tutash nuqtasi to‘g‘risidagi shartnoma imzolandi
2025-04-01 09:00:00 / Yangiliklar
Kecha Xo‘jandda ahamiyati beqiyos voqea sodir bo‘ldi. O‘zbekiston, Tojikiston va Qirg‘izistonning mustaqil rivojlanish tarixida ilk bor uch mamlakat davlat chegaralarining tutash nuqtasi to‘g‘risidagi shartnoma imzolandi.
Ushbu tarixiy kelishuv mamlakatlarimiz tarixida yangi sahifa ochib, “bir asrlik muammo”ga nuqta qo‘yadi hamda butun mintaqaning uzoq muddatli barqarorligi va ravnaqi uchun mustahkam poydevor yaratadi.
O‘n yillar davomida chegara masalalarining hal etilmaganligi, ayniqsa, aholisi zich Farg‘ona vodiysida keskinlik va nizolar manbai bo‘lib keldi. Bu hududda uch mamlakat fuqarolari yonma-yon, ba’zan bir ko‘chaning ikki tomonida yashashi odatiy hol. Tojikiston va Qirg‘iziston o‘rtasidagi chegara shartnomasi, shuningdek, bugungi uch tomonlama shartnomaning imzolanishi bu vaziyatni tubdan o‘zgartirib, yuzaga kelishi mumkin bo‘lgan nizolar manbaini bartaraf etadi.
Endi chegaralar uzil-kesil belgilangach, mamlakatlarimiz uchun savdo-iqtisodiy, transport, madaniy-gumanitar va ekologik hamkorlikni kengaytirish uchun keng imkoniyatlar ochilmoqda. Buning misli ko‘rilmagan iqtisodiy samarasi tez orada o‘zini namoyon etadi.
2017-2018-yillarda O‘zbekiston–Qirg‘iziston davlat chegaralari to‘g‘risidagi shartnoma, O‘zbekiston, Qozog‘iston va Turkmaniston o‘rtasida davlat chegaralarining tutash nuqtasi to‘g‘risidagi shartnoma, O‘zbekiston va Tojikiston o‘rtasida chegara uchastkalari bo‘yicha shartnoma imzolandi.
Bunday kelishuvlarga erishish Markaziy Osiyoning barcha davlatlari yetakchilarining kuchli siyosiy irodasi, pragmatik yondashuvi, hamkorlik va o‘zaro anglashuvga intilishi tufayli bo‘ldi.
Eng muhim natijalardan biri — bugungi kunda xalqaro hamjamiyat Markaziy Osiyoga umumiy o‘ziga xoslikka va o‘zaro bog‘liq manfaatlarga ega yaxlit mintaqa sifatida qarashni boshladi.
Umuman olganda, yuqoridagi tarixiy yutuqlar hatto eng murakkab masalalarni ham ochiq muloqot, hurmat va o‘zaro ishonch orqali samarali hal etish mumkinligiga yorqin misoldir. Bugun Markaziy Osiyo butunlay yangi – jipslashgan va kuchli, dunyoga va keng ko‘lamli sheriklik uchun ochiq mintaqadir. Bu, albatta, quvonarlidir!