Energetika vazirligi va tizim tashkilotlari xodimlari xorij tajribasi asosida bilimlarini oshirmoqdalar
2024-11-26 17:00:00 / Yangiliklar
Avval xabar berganimizdek, yoqilgʻi-energetika tizimida faoliyat yuritayotgan xodimlar malakasini xorij mamlakatlari tajribalari asosida oshirishni yanada kuchaytirish, chet elda olingan bilim, koʻnikma va tajribalarni barcha masʼul xodimlarga yetkazish maqsadida Energiya menejer mutaxassislarini tayyorlash boʻyicha qisqa muddatli oʻquv kursi oʻtkazilmoqda.
Bugungi saboqlar doirasida Energetika vazirligi huzuridagi Qayta tiklanuvchi energiya manbalari milliy ilmiy-tadqiqot institutining Ilmiy ishlar boʻyicha direktor oʻrinbosari, texnika fanlari doktori Jobir Ahadovning Kyushu universiteti (Yaponiya)ga xizmat safari doirasida oʻrgangan tajribalari yuzasidan maʼlumot berildi.
Spiker oʻz maʼruzasida “Mintaqadagi sanoat va ekologik xususiyatlarni hisobga olgan holda “yashil” vodorodni samarali ishlab chiqarish uchun innovatsion texnologiyalarni rivojlantirish” mavzusidagi SATREPS loyihasi tadqiqotlari doirasida Kyushu universitetining ilmiy-tadqiqot laboratoriyalari faoliyati, ularning tajribalari hamda loyiha boʻyicha rejalashtirilgan vazifalarning bajarilishi haqida tushuntirishlar berdi.
Onlayn shaklda oʻtkazilgan oʻquv-seminarda aksiyadorlik jamiyatlarining qayta tiklanuvchi energiya manbalari va energiya samaradorligi hamda xalqaro hamkorlik yoʻnalishidagi boʻlinmalari xodimlari qatnashdi.