Bugun, 22-sentabr — Butunjahon avtomobilsiz kun!
2024-09-22 14:00:00 / Yangiliklar
“Shahar insonlar uchun maskan, hayot uchun maskan” shiori ostida shu kuni butun dunyo boʻylab yirik shaharlar aholisi shahar boʻylab sayohat qilish uchun avtomobillardan emas, tramvay, trolleybus, avtobus, metro, velosiped kabi transport vositalaridan foydalanishadi yoki piyoda yurishadi.
O‘zbekistonda bu aksiyani har oyning to‘rtinchi chorshanbasida o‘tkazishga qaror qilingan. Mazkur oyda Ekologiya vazirligi tomonidan boshqa idoralar bilan birgalikda 25-sentabr, chorshanba kuni Toshkent, Nukus shaharlari va respublika viloyatlari maʼmuriy markazlarida “Avtomobilsiz kun” tashkil etiladi.
Hurmatli fuqarolar, siz har oyda kamida bir kun avtomobilingizdan voz kechib, shaharlarimiz havosi ifloslanishini kamaytirish va sifatini yaxshilashga hissa qo'sha olasiz. Shunday ekan, ommaviy harakatga qoʻshiling va biz nafas olayotgan havo toza bo‘lishi va atrof-muhit hayot uchun yanada yaxshilanishiga yordam bering!