Yangiyo‘l tumanining elektr ta’minotida yillar davomida to‘planib qolgan muammolar bosqichma-bosqich bartaraf etilmoqda
2026-08-11 17:00:00 / Yangiliklar
Toshkent viloyatining Yangiyo‘l tumanida aholi va tadbirkorlarni elektr energiyasi bilan barqaror ta’minlash, mavjud muammolarni manzilli aniqlash va bartaraf etish, elektr tarmoqlari infratuzilmasini yaxshilash hamda energiya yo‘qotishlarini kamaytirish bo‘yicha amaliy ishlar olib borilmoqda.
Tumandagi 51 ta mahallaning barchasida aholi va tadbirkorlarning elektr energiyasiga bo‘lgan oylik, choraklik va yillik ehtiyoji o‘rganilib, har bir mahallaning energiya iste’moli balansi shakllantirildi.
O‘rganishlar natijasida tumanda qo‘shimcha 1,4 MVt elektr quvvatiga ehtiyoj borligi, 102 ta transformator punktini modernizatsiya qilish, 459 km elektr tarmoqlarini rekonstruksiya qilish va 30,5 km yangi tarmoq tortish zarurligi aniqlandi. Shuningdek, ASKUE tizimiga mos kelmaydigan 285 ta hisoblagich hamda og‘ir texnik holatdagi 51 ta transformator mavjudligi belgilab olindi.
Bugungi kunga qadar 2 161 ta xonadon, 19 ta tadbirkorlik subyekti va 4 ta ijtimoiy soha obyektining elektr ta’minoti holati o‘rganilib, aniqlangan muammolarning asosiy qismi bartaraf etildi.
Shuningdek, 94 ta transformator punkti va 31 ta tayanch ustuni ta’mirlandi, 7 ta yangi transformator punkti hamda 170 ta yangi ustun o‘rnatildi. 105,4 km elektr tarmog‘i daraxt shox-shabbalaridan tozalandi. Bu ishlar tarmoqlarning ishonchliligini oshirish va avariyaviy uzilishlarning oldini olishga qaratilgan.
ASKUE tizimiga mos kelmaydigan hisoblagichlarni yangilash ishlari doirasida 32 ta hisoblagich zamonaviy uskunalarga almashtirildi. Shuningdek, ma’lumot uzatmayotgan 24 ta qurilmaning ishlashi tiklandi.
O‘rganishlar davomida aniqlangan elektr ta’minoti bilan bog‘liq kamchiliklar bo‘yicha mas’ul tashkilotlar va mutasaddilarga aniq vazifalar belgilanmoqda. Ayniqsa, aholi xonadonlari, tadbirkorlik subyektlari va ijtimoiy soha obyektlarining elektr ta’minotiga alohida e’tibor qaratilmoqda.
Amalga oshirilgan ishlar natijasida elektr energiyasi bo‘yicha 3,7 mlrd so‘m qarzdorlik undirildi. Shuningdek, 1 mlrd 885 mln so‘m miqdoridagi noreal qarzdorlik qisqartirildi.
Elektr energiyasidan noqonuniy foydalanish holatlarini aniqlash bo‘yicha ham nazorat tadbirlari kuchaytirildi. Tadbirlar davomida 30 ta tashkilotda elektr energiyasidan noqonuniy foydalanish holatlari bo‘yicha dalolatnomalar rasmiylashtirildi.