Olmazor va Shayxontohur tumanlarining elektr ta’minotidagi uzilish qisqa vaqt ichida qayta tiklandi
2026-08-05 17:20:00 / Yangiliklar
Bugun soat 15:17 da Toshkent shahridagi 110 kVli “L-Navoiy-2” elektr uzatish tarmog‘ida nosozlik yuzaga kelgan.
Buning oqibatida Olmazor va Shayxontohur tumanlarining ayrim hududlarida elektr ta’minotida qisqa muddatli uzilish kuzatilgan.
Ma’lum bo‘lishicha, nosozlikka qurilish ishlarini olib borayotgan tashkilotning maxsus texnikasi haydovchisi tomonidan xavfsizlik texnikasi talablariga rioya etilmagani sabab bo‘lgan. Oqibatda elektr uzatish tarmog‘iga shikast yetkazilgan.
Energetiklar tomonidan tezkor choralar ko‘rilib, soat 15:49 da elektr ta’minoti muqobil manbalar orqali to‘liq tiklangan.
Hurmatli iste’molchilar, ayrim hollarda elektr tarmoqlari yaqinida xavfsizlik qoidalariga rioya etmasdan olib borilayotgan qurilish va boshqa ishlar ham iste’molchilarning elektr ta’minotida uzilishlarga sabab bo‘ladi.
Eng muhimi, bu kabi qoidabuzarliklar nafaqat elektr ta’minotiga, balki inson hayotiga ham jiddiy xavf tug‘diradi. Elektr tarmoqlari yaqinida maxsus texnikalar bilan xavfsizlik talablariga amal qilmasdan ishlash og‘ir baxtsiz hodisalarga, hatto insonning kuchlanish ostida qolib hayotdan ko‘z yumishiga ham olib kelishi mumkin.
Shu bois, agar elektr uzatish tarmoqlari yaqinida maxsus texnikalar bilan xavfsizlik qoidalariga rioya etilmagan holda ishlar olib borilayotganiga guvoh bo‘lsangiz, befarq bo‘lmang. Imkon qadar ularni ehtiyotkorlikka chaqirishingizni so‘raymiz.
Har birimizning hushyorligimiz insonlar hayoti va elektr ta’minoti barqarorligini saqlashga xizmat qiladi.