Oʻzbekiston Respublikasi Energetika vazirligi

Prezidentimizning yoshlar bilan bo‘lib o‘tgan ochiq muloqotlarida belgilangan ustuvor vazifalar ijrosini ta’minlash maqsadida Energetika vazirligi tomonidan oliy ta’lim muassasalari bitiruvchilari uchun ochiq muloqot va bo‘sh ish o‘rinlari yarmarkasi tashkil etildi.

Unda Energetika vaziri Jo‘rabek Mirzamahmudov hamda vazirlik tizimidagi korxona va tashkilotlar rahbarlari ishtirok etib, yoshlar bandligini ta’minlash, ularning innovatsion tashabbuslarini qo‘llab-quvvatlash hamda yoqilg‘i-energetika tarmog‘i uchun malakali kadrlar tayyorlash masalalarini muhokama qildilar.

Tadbirda Toshkent davlat texnika universiteti, I.M.Gubkin nomidagi Neft va gaz universiteti, Toshkent irrigatsiya va qishloq xo‘jaligini mexanizatsiyalash muhandislari instituti Milliy tadqiqot universiteti hamda I.D. Mendeleyev nomidagi Kimo-texnologiya universitetining professor-o‘qituvchilari va 130 nafardan ortiq bitiruvchi yoshlar ishtirok etdi.

Uchrashuvda “Issiqlik elektr stansiyalari” AJ, “O‘zenergosotish” AJ, “Hududiy elektr tarmoqlari” AJ, “O‘zbekgidroenergo” AJ, “O‘zbekneftgaz” AJ, “O‘ztransgaz” AJ, “Hududgazta’minot” AJ, “O‘zbekiston milliy elektr tarmoqlari” AJ, Qayta tiklanuvchi energiya manbalari milliy ilmiy-tadqiqot instituti hamda “Milliy dispetcherlik markazi” DUK rahbarlari ishtirok etib, o‘z tashkilotlaridagi bo‘sh ish o‘rinlari, mehnat sharoitlari, kasbiy rivojlanish imkoniyatlari hamda sohadagi istiqbolli yo‘nalishlar haqida batafsil ma’lumot berdilar.

Ochiq muloqot davomida yoshlar tomonidan bildirilgan taklif va tashabbuslar muhokama qilinib, sohada yoshlar bandligini ta’minlash va ularning salohiyatini ro‘yobga chiqarishga qaratilgan bir qator muhim vazifalar belgilab olindi. Jumladan:

➖oliy ta’lim muassasalarini tamomlagan, ammo bandligi ta’minlanmagan yoshlarni energetika tizimidagi yirik korxona va tashkilotlarda kafolatli ish o‘rinlari bilan ta’minlash;
➖“1000 ta masalaga — yoshlardan 1000 ta yechim” loyihasi doirasida tizim tashkilotlaridagi dolzarb muammolar bo‘yicha ochiq innovatsion tanlovlar tashkil etish, eng yaxshi texnologik yechimlar mualliflarini munosib rag‘batlantirish;
➖yoqilg‘i-energetika sohasida faoliyat yuritayotgan istiqbolli mutaxassislar orasidan “100 nafar yosh energetik”ni saralab olish, ularni nufuzli xorijiy kompaniyalar va xalqaro tashkilotlarda stajirovka o‘tashga yuborish hamda muvaffaqiyatli yakunlagan yoshlarni rahbar kadrlar zaxirasiga kiritish.

Shuningdek, tarmoq uchun raqobatbardosh va zamonaviy bilimlarga ega mutaxassislar tayyorlash, ta’lim, ilm-fan va ishlab chiqarish integratsiyasini yanada mustahkamlash maqsadida Energetika vazirligi hamda mazkur oliy ta’lim muassasalari o‘rtasida hamkorlik memorandumlari imzolandi.

Tadbir ochiq muloqot ruhida o‘tib, yoshlar o‘zlarining innovatsion g‘oya va takliflari bilan faol ishtirok etdilar. Sohada mehnat faoliyatini boshlash istagini bildirgan 100 nafardan ortiq bitiruvchi bevosita ish beruvchi tashkilotlar rahbarlariga biriktirildi. Shuningdek, 80 nafardan ortiq yosh aksiyadorlik jamiyatlari va ularning tizim tashkilotlarida mavjud bo‘sh ish o‘rinlari bo‘yicha suhbatlarga taklif etildi.

Mazkur tadbir yoqilg‘i-energetika sohasi uchun malakali kadrlar zaxirasini shakllantirish, yoshlarning bandligini ta’minlash hamda ularning bilim va salohiyatini amaliyot bilan uyg‘unlashtirish yo‘lidagi muhim amaliy qadamlardan biri bo‘lib xizmat qiladi.