Oʻzbekiston Respublikasi Energetika vazirligi

Korrupsiyaga qarshi kurashish agentligi direktorining buyrug‘i bilan tasdiqlangan “Davlat organi yoki tashkilotida mehnat shartnomasi tugatilgan yoki xizmatdan bo‘shatilgan xodimni o‘zi nazoratni amalga oshirgan tashkilotlarga ishga qabul qilishda korrupsiyaga qarshi ichki nazorat bo‘linmasidan xulosa olish tartibi to‘g‘risida”gi Nizom davlat ro‘yxatidan o‘tkazildi.

Nizomga ko‘ra, davlat organi yoki tashkilotidan bo‘shagan xodimni ikki yil davomida u bevosita yoki bilvosita nazoratni amalga oshirgan tashkilotga ishga qabul qilishda ish beruvchining kadrlar bo‘linmasi xodim avval faoliyat yuritgan tashkilotning korrupsiyaga qarshi ichki nazorat bo‘linmasi xulosasini olishi majburiy etib belgilandi.

Agar ishga qabul qilish tanlov asosida amalga oshirilsa, korrupsiyaga qarshi ichki nazorat bo‘linmasining xulosasi tanlovda inobatga olinadi.

Ichki nazorat bo‘linmasining xulosasi olinmagan taqdirda, xodimni o‘zi bevosita yoki bilvosita nazorat qilgan tashkilotga ishga qabul qilishga yo‘l qo‘yilmaydi.

Mazkur xulosa xodim faoliyat yuritgan tashkilotning kadrlar bo‘linmasi, kasaba uyushmasi hamda yuridik bo‘linmasi (mavjud bo‘lsa) bilan majburiy tartibda kelishiladi.

Nizom bilan korrupsiyaviy xavflarni baholashning yagona mezonlari joriy etildi. Unga ko‘ra, har bir holat bo‘yicha xavf darajasi baholanib, natijasiga qarab ishga qabul qilishga rozilik berish, muayyan cheklovlar bilan rozilik berish yoki ishga qabul qilishni rad etish to‘g‘risida xulosa rasmiylashtiriladi.

Unga ko‘ra, ichki nazorat bo‘linmasi xulosa berishda ishga qabul qilish bilan bog‘liq korrupsiyaviy xavf darajasini “past”,“o‘rta” va “yuqori” toifalar bo‘yicha baholaydi hamda quyidagi xulosalardan birini beradi:

– ijobiy – ishga qabul qilishga rozilik beriladi (korrupsiyaviy xavf darajasi “past” bo‘lsa);
– cheklovli ijobiy – muayyan cheklovlar belgilangan holda ishga qabul qilishga rozilik beriladi (korrupsiyaviy xavf darajasi “o‘rta”bo‘lsa);
– salbiy – ishga qabul qilish rad etiladi(korrupsiyaviy xavf darajasi “yuqori” bo‘lsa).

Xodim korrupsiyaga qarshi ichki nazorat bo‘linmasining xulosasidan norozi bo‘lgan taqdirda, qonunchilikda belgilangan tartibda yuqori turuvchi tashkilotga yoki Korrupsiyaga qarshi kurashish agentligiga shikoyat qilish huquqiga ega.

Nizomning amaliyotga joriy etilishi davlat organlari va tashkilotlarida “aylanma eshik” (revolving door) bilan bog‘liq korrupsiyaviy xavflarni kamaytirish, manfaatlar to‘qnashuvining oldini olish, halollik va xolislik tamoyillarini mustahkamlash , shuningdek, davlat xizmatida ochiqlik va shaffoflikni yanada kuchaytirishga xizmat qiladi.

Nizom rasmiy e‘lon qilingan kundan e‘tiboran uch oy o‘tgach kuchga kiradi.