Oʻzbekiston Respublikasi Energetika vazirligi

Energetika vazirligida I.M.Gubkin nomidagi neft va gaz universiteti talabalari bilan uchrashuv bo‘lib o‘tdi. Uchrashuv doirasida talabalar tomonidan ishlab chiqilgan innovatsion loyihalar taqdim etilib, ularning amaliy ahamiyati va istiqbollari yuzasidan muhokamalar o‘tkazildi.

Tadbirda vazirlik mutaxassislari, “O‘zbekneftgaz” AJ va “O‘ztransgaz” AJ vakillari, shuningdek, universitet rahbariyati hamda professor-o‘qituvchilari ishtirok etdi.

Taqdimot davomida talabalar to‘rtta innovatsion loyiha bilan tanishtirdi. Xususan, xlorella mikrosuv o‘ti yordamida suv havzalarini neft ifloslanishidan tozalash, uzoq hududlarda joylashgan neft-gaz obyektlaridagi xodimlarning sog‘ligi va geolokatsiyasini avtomatlashtirilgan tarzda nazorat qilish, kichik kimyoviy laboratoriyalar uchun mobil gaz analizatorini yaratish hamda malaka va mehnat bozori o‘rtasidagi integratsiyani ta’minlovchi “SkillBridge” platformasini rivojlantirishga qaratilgan loyihalar taqdim etildi.

Uchrashuv davomida yoshlarning ilmiy-innovatsion tashabbuslarini qo‘llab-quvvatlash, istiqbolli g‘oyalarni amaliyotga tatbiq etish hamda ularni tarmoq korxonalari faoliyatiga integratsiya qilish masalalari atroflicha muhokama qilindi. Talabalar tomonidan ilgari surilgan taklif va ishlanmalar mutaxassislar tomonidan ijobiy baholanib, ularni yanada takomillashtirish yuzasidan tavsiyalar berildi.

Tadbir yakunida yoshlar va soha mutaxassislari o‘rtasidagi bunday muloqotlar innovatsion g‘oyalarni qo‘llab-quvvatlash, iqtidorli yoshlarning salohiyatini ro‘yobga chiqarish hamda energetika tarmog‘iga zamonaviy yechimlarni keng joriy etishda muhim ahamiyat kasb etishi ta’kidlandi.

Eslatib o‘tamiz, Prezidentimiz topshirig‘iga muvofiq, har payshanba kuni vazirlik va idoralarda “Yoshlar kuni” doirasida yoshlar bilan ochiq muloqotlar hamda “Rahbar va yoshlar uchrashuvi” tadbirlari muntazam tashkil etib kelinmoqda.