Oʻzbekiston Respublikasi Energetika vazirligi

Assalomu alaykum.

Joriy yilning yanvar–may oylarida yoqilg‘i-energetika sohasiga doir jismoniy va yuridik shaxslardan kelib tushgan murojaatlarni ko‘rib chiqish natijalari haqida ma’lumot beramiz.

Ma’lumki, Prezidentimizning 2026-yil 13-mart kuni o‘tkazilgan videoselektor yig‘ilishida Xalq murojaatlari bilan ishlash tizimini yangi bosqichga olib chiqish, aholi fikrini chuqur tahlil qilish va muammolarga tezkor yechim topish bo‘yicha muhim vazifalar belgilab berilgan edi.

Bugungi kunda aholi murojaatlarini o‘z vaqtida ko‘rib chiqish, fuqarolarni qiynayotgan masalalarga tezkor va samarali yechim topish sohaning ustuvor vazifalaridan biri hisoblanadi. Shu maqsadda, kelib tushish manbaidan qat’i nazar, barcha murojaatlar O‘zbekiston Respublikasi Prezidentining Virtual qabulxonasi orqali ro‘yxatga olinib, muntazam tahlil qilinmoqda hamda ko‘tarilgan masalalar yuzasidan tegishli choralar ko‘rilmoqda.

2026-yilning dastlabki besh oyi davomida yoqilg‘i-energetika sohasiga doir jami 49 240 ta murojaat kelib tushgan. Shundan 29 844 tasi yoki 60 foizi O‘zbekiston Respublikasi Prezidentining Virtual qabulxonasi orqali qabul qilingan.

Murojaatlarning asosiy qismi suyultirilgan gaz ballonlarini to‘ldirishdagi muammolar, tabiiy gaz iste’moli uchun hisob-kitoblar, elektr ta’minotidagi uzilishlar, elektr tarmoqlarini yangilash hamda elektr energiyasi uchun hisob-kitoblar bilan bog‘liq masalalar hissasiga to‘g‘ri keladi.

Tabiiy va suyultirilgan gaz ta’minoti bo‘yicha jami 24 908 ta murojaat kelib tushgan bo‘lib, bu umumiy murojaatlarning 50,5 foizini tashkil etadi. Ushbu ko‘rsatkich o‘tgan yilning mos davriga nisbatan 4 817 taga yoki 24 foizga oshgan.

Eng ko‘p murojaatlar gaz ballonlarini to‘ldirish masalasiga to‘g‘ri kelib, bu yo‘nalishda 11 050 ta murojaat qayd etilgan. Bu o‘tgan yilning mos davriga nisbatan qariyb 21 foizga ko‘pdir. Shu bilan birga, yangi maishiy gaz ballonlari bilan ta’minlash va gaz uchun to‘lovlarga oid murojaatlar soni sezilarli darajada kamaygan.

Elektr ta’minoti bo‘yicha esa jami 16 635 ta murojaat qayd etilgan bo‘lib, bu umumiy murojaatlarning 34 foizini tashkil etadi. Mazkur yo‘nalishdagi murojaatlar soni o‘tgan yilga nisbatan kamaygan.

Ayniqsa, elektr ob’ektlarini qurish va ta’mirlash, elektr hisoblagichlari bilan bog‘liq nosozliklar, iste’molchilarning to‘lovlari va qarzdorligi, shuningdek, elektr ta’minoti xodimlari faoliyatiga oid murojaatlar sonining qisqargani kuzatilmoqda. Bu esa tizimda amalga oshirilayotgan modernizatsiya ishlari va aholiga xizmat ko‘rsatish sifatini oshirishga qaratilgan chora-tadbirlar samara berayotganidan dalolatdir.

Vazirlar Mahkamasining 2026-yil 15-maydagi “Yoqilg‘i-energetika resurslari narxlarini belgilash to‘g‘risida”gi 243-son qarori bilan bog‘liq tarif va narx masalalari yuzasidan 381 ta murojaat kelib tushgan bo‘lib, bu o‘tgan yilga nisbatan qariyb 48 foizga kamdir. Bu holat mazkur yo‘nalishda olib borilgan huquqiy tushuntirish ishlari hamda iste’molchilar bilan muloqot samaradorligi ortib borayotganini ko‘rsatadi.

Shuningdek, sohaga doir boshqa masalalar bo‘yicha 7 316 ta murojaat qayd etilgan.

Kelib tushgan murojaatlarni ko‘rib chiqish natijalariga to‘xtaladigan bo‘lsak, jami murojaatlarning 44 593 tasi yoki 91 foizi ijobiy hal etilgan. Bu murojaatlarda ko‘tarilgan masalalar bo‘yicha amaliy choralar ko‘rilgan va bu fuqarolar muammolariga yechim topilganini anglatadi.

Xususan, tabiiy va suyultirilgan gaz ta’minoti bo‘yicha 18 659 ta yoki 75 foiz murojaat o‘z yechimini topgan. Jumladan, gaz ballonlarini yetkazib berish va taqsimlash bilan bog‘liq 9 366 ta, tabiiy gaz hisoblagichlari bo‘yicha 3 470 ta hamda gaz bosimi va ta’minoti bilan bog‘liq 2 576 ta murojaat ijobiy hal etilgan.

Elektr ta’minoti bo‘yicha esa 8 991 ta murojaat, ya’ni mazkur toifadagi murojaatlarning 54 foizi ijobiy hal qilingan. Xususan, elektr ta’minotidagi uzilishlar bo‘yicha 4 209 ta, elektr tarmoqlarini qurish va ta’mirlash masalalari bo‘yicha esa 2 199 ta murojaat ijobiy hal etilgan.

Hududlar kesimida tahlillar shuni ko‘rsatadiki, eng ko‘p murojaatlar aholi soni va iste’molchilar ulushi yuqori bo‘lgan hududlarga to‘g‘ri kelmoqda.

Jumladan, Qashqadaryo viloyatidan 6 314 ta, Samarqand viloyatidan 5 272 ta, Andijon viloyatidan 5 269 ta, Toshkent viloyatidan 4 862 ta, Surxondaryo viloyatidan 4 600 ta hamda Toshkent shahridan 4 468 ta murojaat kelib tushgan.

Ijobiy hal etilgan murojaatlar soni bo‘yicha Andijon viloyati 4 042 ta, Qashqadaryo viloyati 3 364 ta, Samarqand viloyati 3 129 ta va Toshkent viloyati 3 038 ta ko‘rsatkich bilan yuqori natijalarni qayd etgan.

Aholi tomonidan bildirilayotgan taklif va muammolar asosida tizimdagi kamchiliklar aniqlanib, ularni bartaraf etish bo‘yicha manzilli chora-tadbirlar amalga oshirilmoqda.

Shu o‘rinda iste’molchilarga eslatib o‘tamiz: murojaatlarni ko‘rib chiqish jarayonida yo‘l qo‘yilgan qonun buzilishi holatlari yuzasidan vazirlikning (71) 231-10-64 aloqa kanali, (71) 231-81-18 ishonch telefoni hamda ijtimoiy tarmoqlardagi rasmiy sahifalar orqali murojaat qilish mumkin.

E’tiboringiz uchun rahmat.