O‘zbekiston va Ozarbayjon Respublikasi Hukumatlari o‘rtasidagi kelishuvlarni mustahkamlovchi hamda energetika sohasida hamkorlikni yanada chuqurlashtirish bo‘yicha bir qator ishlar olib borilmoqda.

Magistral elektr tarmoqlari va podstansiyalarini rivojlantirish, sohaga raqamli texnologiyalarni jalb qilish hamda qayta tiklanuvchi energiya manbalarini yagona energetika tarmog‘iga integratsiya qilish maqsadida “O‘zbekiston milliy elektr tarmoqlari” AJ tomonidan Jahon banki ishtirokida “Elektr energetika sektorini transformatsiya qilish va barqaror elektr uzatish” investitsiya loyihasi amalga oshirilmoqda.

Ushbu loyihaning bir qismi sifatida respublika bo‘ylab 110 – 500 kVli 22 ta podstansiyada modernizatsiya va rekonstruksiya ishlarini olib borish rejalashtirilgan.

Jumladan, Farg‘ona, Xorazm va Toshkent viloyatlarida joylashgan 110 kV kuchlanishli “2 A”, “Xazorasp” va “Chinoz” podstansiyalarini modernizatsiya va rekonstruksiya qilish bo‘yicha xalqaro tender savdolari o‘tkazildi. Tender natijalariga ko‘ra, Ozarbayjonning “AZENCO” OAJ kompaniyasi g‘olib deb topildi va 2024-yil 19-iyulda g‘olib kompaniya bilan loyihalarni amalga oshirish bo‘yicha shartnoma imzolandi.

Ushbu uchta podstansiyaning to‘liq modernizatsiya va rekonstruksiya qilinishi natijasida qariyb 100 MVA (megavolt amper) qo‘shimcha quvvat yaratiladi. Bu, o‘z navbatida, Farg‘ona, Xorazm va Toshkent viloyatlaridagi aholi va sanoat iste’molchilarini elektr energiyasi bilan ta’minlash ishonchliligini bir necha barobar oshiradi.

Ozarbayjonning “AZENCO” OAJ kompaniyasi bilan hamkorlikda amalga oshirilayotgan ushbu loyiha ikki davlat o‘rtasidagi do‘stlik va iqtisodiy hamkorlik aloqalarini mustahkamlash yo‘lida xizmat qiladi. 

Shuningdek, kelgusida energetika sohasida davlatlararo o‘zaro manfaatli loyihalarni amalga oshirish uchun mustahkam zamin yaratadi.