Bugun, 17-aprel kuni Energetika vazirining navbatdagi ochiq muloqoti Gubkin nomidagi neft va gaz universiteti talabalari bilan bo‘lib o‘tdi.
2026-04-17 18:50:00 / Yangiliklar
Bugun, 17-aprel kuni Energetika vazirining navbatdagi ochiq muloqoti Gubkin nomidagi neft va gaz universiteti talabalari bilan bo‘lib o‘tdi.
Unda Energetika vaziri J.Mirzamahmudov, Gubkin nomidagi neft va gaz universiteti ijrochi direktori A.Magrupov, oliy taʼlim muassasasida tahsil olayotgan 250 nafardan ortiq talabalar, o‘qituvchilar va ilmiy xodimlar ishtirok etdi.
Dastlab Energetika vaziri talabalar bilan uchrashuv davomida bugun, 17-aprel — I.M. Gubkin nomidagi neft va gaz universiteti tashkil etilgan sana munosabati bilan barcha ishtirokchilarni samimiy muborakbod etdi.
Muloqot davomida asosiy e’tibor neft-gaz sohasi uchun raqobatbardosh va yuqori malakali kadrlar tayyorlash masalalariga qaratildi. Ta’lim jarayonini ishlab chiqarish bilan yanada yaqin integratsiya qilish, zamonaviy bilim va amaliy ko‘nikmalarga ega mutaxassislarni yetishtirish bugungi kunning dolzarb vazifasi ekani alohida ta’kidlandi.
Shuningdek, yoshlarni har tomonlama qo‘llab-quvvatlash, ularning tashabbuslarini rag‘batlantirish va ilmiy-innovatsion faoliyatga keng jalb etish masalalari muhokama markazida bo‘ldi. Talabalar tomonidan ilgari surilgan startap g‘oyalar va amaliy takliflar energetika tizimini rivojlantirishda muhim omil sifatida qayd etildi.
Uchrashuvda nazariya va amaliyot uyg‘unligini ta’minlash, ayniqsa, yirik neft-gaz loyihalari va ishlab chiqarish obyektlarida amaliyot o‘tash imkoniyatlarini kengaytirish zarurligi qayd etildi. Bu borada yosh mutaxassislarning kasbiy tayyorgarligini mustahkamlashga alohida e’tibor qaratilayotgani bildirildi.
Muloqot yakunida esa, iqtidorli yoshlarni aniqlash, ularni tizimli ravishda qo‘llab-quvvatlash hamda kelgusida sohada munosib ish o‘rinlari bilan ta’minlash energetika tizimidagi ustuvor yo‘nalishlardan biri ekani yana bir bor ta’kidlandi.
Mazkur uchrashuv Davlatimiz rahbari tashabbusi bilan joriy etilgan an’anaviy “Yoshlar kuni” (har haftaning payshanba kuni) doirasida tashkil qilindi.