O‘zbekiston Respublikasi Prezidentining 2025-yil 25-iyuldagi PF-117-son farmoni 7(a)-bandiga asosan 2026-yil mart oyida Energetika vazirligida ijro intizomini ta’minlash bo‘yicha amalga oshirilgan ishlar to‘g‘risida ma’lumot.

Davlat hokimiyatining jamiyat oldidagi eng asosiy vazifasi sifatida aholi hayoti darajasi va sifatini oshirish bo‘yicha islohotlarning natijadorligi bevosita ularni amalga oshirishga qaratilgan hujjatlar va qarorlarni ijro etish bo‘yicha intizomning qat’iyligiga bog‘liq.

Bu borada aniq rahbarlik, shaxsiy mas’uliyat, qat’iy intizom hamda tashabbuskorlik zarur. Bularning barchasi samarali va natijali mehnat poydevori bo‘lishi lozim.

Ijro intizomini yanada mustahkamlash maqsadida O‘zbekiston Respublikasi Prezidentining 2021-yil 10-fevraldagi “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida”gi PF-6166-son farmoni hamda 2021-yil 31-maydagi “Ijro.gov.uz” ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida”gi PQ-5132-son qarori qabul qilindi.

Shu bilan birga, O‘zbekiston Respublikasi Prezidentining 2025-yil 25-iyuldagi “Davlat organlari va tashkilotlarda ijro intizomini yanada mustahkamlashning qo‘shimcha chora-tadbirlari to‘g‘risida”gi PF-117-son farmoni bilan qonunlar, O‘zbekiston Respublikasi Prezidenti va Hukumat hujjatlarining ijrosi ustidan samarali nazorat mexanizmlarini joriy qilish, ijro natijasi bo‘yicha aniq hisobdorlikni ta’minlash, shuningdek, barcha bo‘g‘indagi rahbarlar va xodimlarning ijro intizomiga qat’iy rioya etish bo‘yicha shaxsiy mas’uliyati va javobgarligini yanada oshirish belgilandi.

Energetika vazirligida “Ijro.gov.uz” ijro intizomi idoralararo yagona elektron tizimida qonunlar, O‘zbekiston Respublikasi Prezidentining farmon, qaror, farmoyish va topshiriqlari ijrosi bo‘yicha nazorat va hisobdorlikni tashkil etish tartibiga qat’iy amal qilgan holda ish olib borilmoqda.

“Ijro.gov.uz” tizimida nazoratga olingan qonunchilik hujjatlari va topshiriqlar ijrosi kunlik nazoratga olingan bo‘lib, doimiy tahlil qilinmoqda hamda ularning ijro holati har haftaning juma kuni vazirning birinchi o‘rinbosari huzurida va dushanba kuni vazir huzuridagi apparat yig‘ilishlarida muhokama qilinmoqda.

Ushbu tizim orqali bugungi kun holatiga 2026-yil bo‘yicha qonunlar, O‘zbekiston Respublikasi Prezidentining farmon, qaror, farmoyish va Davlat rahbari raisligida o‘tkazilgan majlislar bayonlarida jami 1 002 ta topshiriq bo‘yicha Energetika vazirligi asosiy mas’ul ijrochi sifatida belgilangan bo‘lib, hisobot davrida ushbu topshiriqlar ijrosi ta’minlanadi.

Shuningdek, O‘zbekiston Respublikasi Vazirlar Mahkamasining topshirig‘iga asosan 2026-yil mart oyida Energetika vazirligi bo‘yicha “Ijro.gov.uz” tizimida joriy yil aprel oyida muddati belgilangan topshiriqlarning barvaqt va sifatli bajarilishini ta’minlash maqsadida vazirning tegishli o‘rinbosarlari va mas’ul tarkibiy bo‘linmalar kesimida tayyorlangan “yo‘l xarita”lar va kunlik kalendar grafiklardagi topshiriqlar ijrosi muhokama qilinib, tasdiqlandi va ijroga qaratildi.

Topshiriqlar ijrosi kunlik nazoratga olingan bo‘lib, barvaqt va sifatli ta’minlash choralari ko‘rilmoqda.

Energetika vazirligi Nazorat va ijro intizomi bo‘limi

02.04.2026-y.