Bugun, 19-fevral kuni Energetika vaziri Jo‘rabek Mirzamahmudovning yoshlar bilan navbatdagi ochiq muloqoti bo‘lib o‘tdi.
2026-02-19 20:00:00 / Yangiliklar
Uchrashuvda vazirlik tizimidagi korxona va tashkilotlarda faoliyat yuritayotgan 100 nafardan ortiq yosh xodimlar, bir qator oliy ta’lim muassasalari talabalari, shuningdek, ommaviy axborot vositalari vakillari ishtirok etdi.
Tadbir avvalida vazir barcha yoshlarni muborak Ramazon oyi bilan samimiy tabriklab, keyingi yillarda mamlakatimizda Davlatimiz rahbari boshchiligida yoshlarni qo‘llab-quvvatlash, ularning salohiyatini ro‘yobga chiqarish, munosib mehnat va ta’lim sharoitlarini yaratish borasida izchil islohotlar amalga oshirilayotganini alohida ta’kidladi.
Bu yo‘nalishda qabul qilinayotgan qator qonun va qarorlar yoshlarning barcha sohalardagi o‘rni va rolini yanada mustahkamlashga xizmat qilayotgani qayd etildi.
Uchrashuv davomida yoqilg‘i-energetika tarmog‘ida yoshlarga oid amalga oshirilayotgan ishlar yuzasidan ma’lumotlar berildi.
Xususan, bugungi kunda sohada 105 mingdan ziyod ishchi-xodim mehnat qilmoqda. Shundan 15 ming 85 nafarini 30 yoshgacha bo‘lgan xodimlar tashkil etadi. Ularning 237 nafari (shu jumladan 7 nafar xotin-qiz) rahbarlik lavozimlarida, 3 ming 316 nafari mutaxassis sifatida, 11 ming 532 nafari esa ishlab chiqarish korxonalarida faoliyat yuritmoqda.
Sohada kadrlar zaxirasini mustahkamlashga alohida e’tibor qaratilmoqda. 2025-yilda 1 ming 358 nafar oliy ta’lim muassasasi bitiruvchisi ishga qabul qilingan bo‘lsa, 1 ming 18 nafar yigit-qiz kollej va texnikumlarni tamomlab, tarmoq korxonalarida mehnat faoliyatini boshladi. Bu esa yoshlarning energetika sohasiga bo‘lgan qiziqishi ortib borayotganini ko‘rsatadi.
Yosh mutaxassislarning tajribasini oshirish maqsadida ular xorijiy davlatlarga xizmat safarlari va malaka oshirish kurslariga yuborilmoqda. Jumladan, 2025-yilning o‘zida 311 nafar xodim xorijda tayyorlov va qayta tayyorlov kurslarida ishtirok etdi.
Shuningdek, muloqotda xorijiy investorlar bilan hamkorlikda yirik quvvatli issiqlik, quyosh va shamol elektr stansiyalarini barpo etish bo‘yicha amalga oshirilayotgan istiqbolli loyihalar haqida ham so‘z yuritildi. Oldinda turgan vazifalar keng qamrovli ekani, yoshlarning tashabbus va innovatsion g‘oyalarini qo‘llab-quvvatlash muhim ahamiyat kasb etishi alohida ta’kidlandi.
Muloqot davomida talabalar va yosh xodimlar o‘zlarining ilmiy izlanishlari, innovatsion takliflari, sohadagi mavjud muammolar va ularning yechimlari bo‘yicha fikr almashdilar.
Shuningdek, yangi loyihalar, xalqaro olimpiadalarda ishtirok etish, sport va madaniy tashabbuslarni rivojlantirishga qaratilgan takliflar qo‘llab-quvvatlandi.
Uchrashuv ochiq va samimiy ruhda o‘tib, yoshlar uchun yana bir muhim muloqot maydoniga aylandi.