Energetika vaziri yosh kimyogarlar bilan uchrashdi
2026-01-17 13:35:00 / Yangiliklar
Bugun, 17-yanvar kuni Energetika vaziri Jo‘rabek Mirzamahmudov kimyo faniga qiziqqan, ilmga chanqoq yosh aka-singillar bilan uchrashuv o‘tkazdi.
Qo‘chqorov Zafarjon ayni paytda 9-sinfda, uning singlisi Qo‘chqorova Zebo esa 7-sinfda tahsil oladi. Ular kimyo fanining sir-asrorlariga bo‘lgan katta qiziqishi sababli “Nekov School” maktabida bilim olishmoqda va qisqa vaqt ichida fandagi faolligi bilan e’tibor qozongan.
Yosh kimyogarlar yaqinda Xalqaro Nobel kongressida ishtirok etib, u yerda dunyoning turli mamlakatlaridan kelgan ilmiy muhit va tajribalar bilan tanishib, unutilmas taassurotlar bilan qaytishgan.
Uchrashuv davomida vazir va yoshlar o‘rtasida kimyo fanining ahamiyati, uning asosiy yo‘nalishlari, fan va ishlab chiqarish o‘rtasidagi uzviy bog‘liqlik haqida qiziqarli va mazmunli muloqot bo‘lib o‘tdi. Yosh kimyogarlar o‘zlarini qiziqtirgan savollariga atroflicha javob olish bilan birga, kelajakdagi maqsadlari va orzulari bilan ham o‘rtoqlashdilar.
Vazir yoshlarga ilm yo‘lida to‘xtab qolmaslik, doim izlanishda bo‘lish va o‘z oldiga katta maqsadlar qo‘yish bo‘yicha maslahatlar berdi. Shuningdek, bunday iqtidorli yoshlar bilan kelgusida ham muntazam uchrashib turishini, ularning tashabbus va yutuqlarini qo‘llab-quvvatlashga doimo tayyor ekanini ta’kidladi.