Oʻzbekiston Respublikasi Energetika vazirligi

“O‘zbekenergota’mir” AJ hamda Respublika kasbiy ko‘nikmalar markazi o‘rtasida ishlab chiqarish sohalarini yoshlar o‘rtasida keng targ‘ib qilish maqsadida o‘zaro hamkorlik memorandumi imzolandi.

Mazkur hujjatga ko‘ra, energetika tizimida mehnat faoliyatini davom ettirish istagida bo‘lgan ta’lim oluvchilar sohaga oid nazariy bilimlarni kasbiy ko‘nikmalar markazlarida, amaliy jihatdan esa bevosita ishlab chiqarish korxonalarida o‘rganish imkoniyatiga ega bo‘ladilar.

Kasbiy ko‘nikmalar markazlari bilan hamkorlikda dual ta’lim tizimini energota’mir sohasiga joriy etish — malakali kadrlar tayyorlashning eng istiqbolli yo‘nalishlaridan biridir. Ushbu tizim yosh mutaxassislarga kelajakdagi ish joyida haqiqiy ishlab chiqarish tajribasini orttirish, korxonalarga esa o‘z ishiga sadoqatli, kasbiy jihatdan tayyor xodimlarni tanlab olish imkonini yaratadi. Natijada, energetika sohasidagi ta’mirlash ishlarining samaradorligi va sifati yanada oshadi.

Dual ta’lim tizimining joriy etilishi yoshlarni ishlab chiqarish muhitiga tez moslashishiga, korxonaning o‘ziga xos ish jarayonlari, texnikasi va korporativ madaniyatini chuqur o‘zlashtirishiga xizmat qiladi.

Shuningdek, ta’lim oluvchilar malakali ustalar (ustoz-trenerlar) rahbarligida, amaliyot o‘tish uchun maxsus jihozlangan o‘quv maydonchalarida haqiqiy ta’mirlash jarayonlarida ishtirok etadilar. Bu esa ularning nazariy bilimlarini amaliy ko‘nikmalarga aylantirish imkonini beradi.

Korxona o‘z navbatida o‘quv dasturlarini shakllantirishda faol ishtirok etib, ta’lim mazmunining energota’mir tizimiga zarur bo‘lgan amaliy talab va standartlarga mos kelishini ta’minlaydi. Talabalarning amaliy ko‘nikmalar kundaliklari hamda o‘quv jarayonidagi yutuqlari markaz va korxona mutaxassislari tomonidan muntazam nazorat qilinadi.

TDTU va bir qator energetika korxonalarida dual ta’lim tizimi joriy qilingan.