O‘zbekistonning JSTga a’zo bo‘lishi: Iqtisodiy islohotlarning yangi bosqichi va global bozorga integratsiy
2026-03-19 17:05:00 / Yangiliklar
O‘zbekistonning JSTga a’zo bo‘lishi: Iqtisodiy islohotlarning yangi bosqichi va global bozorga integratsiya
Bugungi kunda O‘zbekiston o‘z taraqqiyotining muhim tarixiy pallasida turibdi. Prezidentimiz boshchiligida amalga oshirilayotgan keng ko‘lamli islohotlarning bosh maqsadi - xalqimiz farovonligini yuksaltirish va mamlakatimizning jahon hamjamiyatida munosib o‘rin egallashini ta’minlashdir. Bu borada Jahon savdo tashkilotiga (JST) to‘laqonli a’zo bo‘lib kirish iqtisodiy strategiyamizning eng ustuvor yo‘nalishlaridan biri hisoblanadi.
JSTga a’zolik shunchaki xalqaro maqom emas, balki milliy iqtisodiyotimizni sifat jihatidan yangi bosqichga olib chiquvchi, mahalliy tadbirkorlarimiz uchun global maydonda teng imkoniyatlar yaratuvchi strategik qadamdir.
Davlatimiz rahbarining 2026 yil 16 fevraldagi PF-21-son Farmoni bilan tasdiqlangan Davlat dasturi doirasida ushbu jarayonni jadallashtirish bo‘yicha aniq vazifalar belgilab berilgan.
JSTga a’zo bo‘lish jarayonining eng murakkab va mas’uliyatli qismi - bu milliy qonunchilikni va huquqni qo‘llash amaliyotini tashkilotning qat’iy qoida, me’yor va bitimlariga to‘liq moslashtirishdir. Bizning maqsadimiz nafaqat xalqaro talablarni bajarish, balki iqtisodiy va savdo munosabatlarimizda ochiqlik va shaffoflikni ta’minlaydigan mustahkam huquqiy zamin yaratishdir.
Farmonning 407-bandiga muvofiq, 2026 yil yakuniga qadar JST talablari asosida 20 ta normativ-huquqiy hujjat qabul qilinishi belgilangan. Ta’kidlash joizki, bu jarayon tizimli ravishda davom etmoqda.
Xususan, 2023 yildan buyon 80 ga yaqin hujjat qabul qilinishi natijasida JST bitimlariga muvofiqlashtirilgan milliy hujjatlarimizning umumiy soni 180 tadan oshdi.
Jumladan, ularning 64 tasi iqtisodiy siyosat, 32 tasi import-eksportni tartibga solish, 33 tasi sanitariya va fitosanitariya choralari,
15 tasi texnik tartibga solish, 16 tasi intellektual mulk, 6 tasi xizmatlar savdosi va 3 tasi shaffoflik yo‘nalishlariga to‘g‘ri keladi.
Joriy yilning o‘tgan davrida Qonunchilik harakatlari rejasi doirasida yana 5 ta muhim hujjat qabul qilinib, yil yakuniga qadar qo‘shimcha 15 ta hujjatni ishlab chiqish va amaliyotga joriy etish rejalashtirilgan.
Bu esa milliy qonunchilikni xalqaro savdo qoidalari va standartlariga yanada yaqinlashtirish, savdodagi ortiqcha to‘siqlarni qisqartirish, tadbirkorlik va investisiya muhitini yaxshilash, shuningdek, mamlakatimiz iqtisodiyotining ochiqligi va raqobatbardoshligini oshirishga xizmat qiladi.
O‘zbekistonning JSTga a’zo bo‘lish jarayoni bugungi kunda o‘zining yakuniy pallasiga yaqinlashdi. Bu nafaqat ichki islohotlar, balki a’zo davlatlar bilan olib borilayotgan murakkab ikki tomonlama va ko‘p tomonlama muzokaralar natijasidir.
Xususan, Investisiyalar, sanoat va savdo vazirligi tomonidan boshqa mas’ul idoralar bilan birgalikda a’zo davlatlardan kelib tushayotgan so‘rovlarga asoslangan xulosalarni tayyorlash, Ishchi guruhi yig‘ilishlarini o‘tkazish va yakuniy bayonnomalarni imzolash ustida jadal ish olib borilmoqda. Joriy yilning 9 mart kuni JST Ishchi guruhining 12-yig‘ilishi muvaffaqiyatli o‘tkazilgani jarayonning jadallashganidan dalolat beradi.
Davlat dasturining 408-bandida 2026 yil yakuniga qadar 2 ta xorijiy davlat bilan bozorga kirish bo‘yicha muzokaralarni yakunlash vazifasi qo‘yilgan. Bu yil biz Xitoy Taypeyi va Qozog‘iston bilan muzokaralarni muvaffaqiyatli yakunlashni rejalashtirganmiz. Umuman olganda, O‘zbekiston bilan muzokaralarga qiziqish bildirgan 35 ta davlatdan 33 tasi bilan jarayonlar allaqachon yakuniga yetkazilgani bizning to‘g‘ri yo‘ldan ketayotganimizni ko‘rsatadi.
JSTga a’zo bo‘lishdan asosiy maqsadimiz - mahalliy tadbirkorlarimiz uchun yangi bozorlar va global maydonda teng imkoniyatlar yaratishdir. Biz xalqaro savdo bitimlari va qoidalarini samarali joriy etish orqali iqtisodiy barqarorlikka erishishni maqsad qilganmiz.
Tashkilot standartlariga o‘tish milliy mahsulotlarimizning raqobatbardoshligini oshiradi, eksportchilarimizga kamsitishlarsiz xorijiy bozorlarga kirish imkonini beradi va iqtisodiyotimizga yuqori texnologiyali investisiyalar oqimini ko‘paytiradi. Ochiqlik va shaffoflik tamoyillari esa biznes uchun prognoz qilish mumkin bo‘lgan va xavfsiz muhitni kafolatlaydi.
Xulosa qilib aytganda, JSTga a’zo bo‘lish - bu O‘zbekiston iqtisodiyotining xalqaro tizimga to‘laqonli integratsiyalashuvidir. Biz belgilangan vazifalarni o‘z vaqtida va sifatli ijro etish orqali mamlakatimizning barqaror rivojlanishini hamda xalqaro maydondagi nufuzini yanada mustahkamlaymiz.
Xurram Teshabayev
O‘zbekiston Respublikasi investisiyalar, sanoat va savdo vaziri o‘rinbosari