O‘zbekiston Respublikasi Maktabgacha va maktab ta’limi vazirligi huzuridagi Ixtisoslashtirilgan ta’lim muassasalari agentligi

Farg‘ona shahridagi Prezident maktabi xalqaro maktablar kengashi akkreditatsiyasidan muvaffaqiyatli oʻtdi

CIS (Xalqaro maktablar kengashi) vakillari 2022-yildan boshlab Prezident maktablari faoliyatini oʻrganishni boshlagan edi (https://t.me/piimauz/5239). Oʻtgan davr davomida tashkilot tomonidan maktablarimizda oʻquvchilarga yaratilgan keng sharoitlar, taʼlim jarayonining sifatli tashkil etilgani, taʼlim muassasasi faoliyatining ochiq va shaffofligi, oʻquvchilar xavfsizligi, maktab binosining xavfsizlik talablariga javob berishi kabi jihatlar oʻrganildi. 

 Oʻrganishlar natijasiga koʻra, Agentligimiz tizimidagi Farg‘ona shahridagi Prezident maktabi CIS (Xalqaro maktablar kengashi) akkreditatsiyasidan muvaffaqiyatli oʻtganligi toʻgʻrisidagi sertifikatlarni qoʻlga kiritdi. 

Xalqaro maktablar kengashi a’zosi boʻlish ta’lim muassasasining xalqaro darajada tan olinganini bildiradi. Ushbu maktablarda oʻqiydigan oʻquvchilarning chet eldagi nufuzli universitetlarda toʻliq grant yutish imkoniyati oshadi.

Maʼlumot oʻrnida, Agentligimiz tizimidagi Nukus, Toshkent, Xiva, Namangan hamda Andijon shahridagi Prezident maktablari ham CIS akkreditatsiyadan muvaffaqiyatli o‘tgan.