“Prezident iqtidorli farzandlari” milliy dasturining eng iqtidorli ishtirokchilari AQShda xalqaro yozgi ta’lim dasturida qatnashmoqda.
2026-07-27 13:05:00 / Yangiliklar
O‘zbekiston Respublikasi Prezidentining 2025-yil 15-maydagi PF–86-son Farmoni asosida amalga oshirilayotgan “Prezident iqtidorli farzandlari” milliy dasturi doirasida iqtidorli yoshlar uchun xalqaro ta’lim imkoniyatlari izchil kengaytirilmoqda.
Dastur doirasida navbatdagi muhim xalqaro tashabbus amalga oshirilmoqda. Milliy dastur reytingida eng yuqori natijalarni qayd etgan 10 nafar o‘quvchi hamda o‘quvchilarni dunyoning nufuzli universitetlariga tayyorlash va qabul qilinishida yuqori natijalarga erishgan maktab maslahatchilari AQShdagi IVY League tarkibiga kiruvchi University of Pennsylvania (UPenn) tomonidan tashkil etilgan xalqaro yozgi ta’lim dasturida ishtirok etmoqda.
Dastur davomida ishtirokchilar UPenn professorlari va xalqaro ekspertlar tomonidan olib boriladigan mashg‘ulotlarda qatnashib, zamonaviy ta’lim metodikalari bilan tanishmoqda, xalqaro akademik muhitda tajriba almashmoqda hamda dunyoning yetakchi oliy ta’lim muassasalarida tahsil olish uchun zarur bilim va ko‘nikmalarini yanada mustahkamlamoqda.
Mazkur tashabbus iqtidorli yoshlarni xalqaro maydonda qo‘llab-quvvatlash, ularning raqobatbardoshligini oshirish hamda O‘zbekiston yoshlari uchun dunyoning eng nufuzli universitetlari sari yangi imkoniyatlar yaratishga qaratilgan islohotlarning amaliy samarasidir.