Yangi loyihalar Buxoroda ishsizlikni kamaytirib, aholi daromadini oshirishga xizmat qiladi
2025-01-26 00:10:00 / Vazirlik yangiliklari
Avval xabar berganimizdek, Kambagʻallikni qisqartirish va bandlik vaziri B.Zaxidov ishtirokidagi Ishchi guruh Buxoro viloyatida amalga oshirilayotgan kambagʻallikni qisqartirish, aholi bandligini taʼminlash hamda ularni daromadini oshirish borasida amalga oshirilayotgan loyihalar bilan tanishmoqda.
25-yanvar kuni Ishchi guruh “Qorakoʻl” erkin iqtisodiy hududida “GAS CHEMICAL COMPLEX MTO CENTRAL ASIA” MCHJ tomonidan 225 gektar yer maydonida MTO (metanoldan olefin olish) texnologiyasi asosida gaz-kimyo kompleksini qurish va gaz-kimyo texnologik klasterini tashkil etish loyihasini oʻrgandi.
Umumiy qiymati 5,0 mlrd. AQSH dollariga teng mazkur korxona 2028-yilda faoliyat boshlashi bilan tumanda 2000 ta yangi ish oʻrinlari yaratiladi. Loyiha toʻliq quvvatda ish boshlaganidan soʻng esa 5000 nafar aholini ish bilan taʼminlash imkoniga ega boʻladi.
Shundan soʻng, Ishchi guruh Jondor tumani markazini kesib oʻtuvchi “Zarafshon” daryosi yoqasida qurilishi moʻljallangan “Sohil boʻyi” dam olish maskani loyihasi bilan tanishdi.
Uzunligi 1 km boʻlgan sohilda aholi dam olish uchun saylgoh, umumiy ovqatlanish maskanlari, savdo shahobchalari qad rostlaydi. Qiymati 15 mln. AQSH dollarini tashkil etadigan ushbu maskan faoliyat boshlasa, tuman aholisi uchun 172 ta yangi ish oʻrni yaratiladi.
Vazir B.Zaxidov tumandagi “Qaroli” MFY hududida istiqomat qiluvchi ehtiyojmand oilalar holidan xabar olish uchun xonadonlarga borib, kambagʻal oilalar aʼzolari bilan suhbatlashdi.
Ularni ish bilan taʼminlash, daromadli mehnat qilishi uchun imkoniyatlar yaratish, qoʻllab-quvvatlash borasida mutasaddilarga koʻrsatma va topshiriqlar berdi.
Ishchi guruh Buxoro tumanidagi “Petrochem sepehr” qoʻshma korxonasida boʻlib, korxona investorlari bilan kelgusidagi rejalar va istiqbolli loyihalar haqida muloqotda boʻldi.
Toʻdakoʻl massivida 2023-2026-yil davomida Oʻzbekiston va Turkiya kapitali asosida “Petrochem sepehr” Oʻzbekiston-Eron qoʻshma korxonasi tashkil etish loyihasi amalga oshirilmoqda. Loyihaning umumiy qiymati 274.0 mln. AQSH dollarini tashkil etadi.