2025-yil 1-fevraldan boshlab, nodavlat taʼlim tashkilotlari ham ishtirok etishi mumkin boʻlgan vaucher asosidagi oʻqitish tizimi ishga tushiriladi. Birinchi bosqichda bu tizim Toshkent shahri va Samarqand viloyatida joriy etiladi.

Ushbu dasturning afzalligi – ishsiz fuqarolarga davlat tashkilotlari bilan bir qatorda nodavlat taʼlim tashkilotlarini ham ixtiyoriy tanlash huquqi beriladi. Yaʼni, “Taʼlim oluvchi ortidan pul boradi” tamoyili amal qiladi.

Oʻqitishni moliyalashtirish Bandlikka koʻmaklashish jamgʻarmasi hisobidan ikki bosqichda amalga oshiriladi: vaucher qiymatining 50 foizi oʻqish boshlanganidan soʻng, qolgan 50 foizi esa yakuniy imtihon muvaffaqiyatli topshirilgandan soʻng toʻlanadi.

Asosiy maqsad – xususiy sektorni keng jalb qilish, raqobatni hamda kasb-hunar tayyorgarligining sifatini oshirishdir.
Vazirlik manfaatdor nodavlat taʼlim tashkilotlarini ushbu dasturda ishtirok etishga taklif etadi.

Dasturda ishtirok etish uchun taʼlim tashkilotlari ecosys.mehnat.uz platformasi orqali taʼlim muassasalari reyestriga kirishi lozim. Reyestrga kirish uchun quyidagi hujjatlar talab qilinadi:

-  taʼlim xizmatlarini koʻrsatish faoliyati boʻyicha litsenziya yoki xabarnoma qabul qilinganligi toʻgʻrisida tasdiqlangan maʼlumotlar;
-  mavjud filiallari va ularning manzillari (mavjud boʻlsa);
-  oʻquv kurslarining yoʻnalishlari va umumiy joy oʻrinlari;
-  oʻquv kurslarini olib boradigan oʻqituvchi, usta va murabbiylar malakasini tasdiqlovchi hujjat (diplom, sertifikat, staj va boshqa tegishli hujjatni biriktirish);
-  oʻquv va dars jarayonlarini tashkil etish uchun sinfxonalar, mashgʻulot xonalari va boshqa zarur ishlab chiqarish maydonlari hamda jihozlar toʻgʻrisida maʼlumotlar (fotosuratlar bilan);
-  oʻquv xonalaridagi oʻquv jarayonini onlayn va offlayn rejimda monitoring qilish uchun internet tarmogʻi mavjudligi;
-  xalqaro tashkilotlar tomonidan berilgan sertifikatlar (mavjud boʻlsa).

Ushbu dastur doirasida va boshqa manbalar hisobiga nodavlat taʼlim muassasalari tomonidan berilgan sertifikatlar Vazirlikning maʼlumotlar bazasiga kiritiladi va oʻqishni tamomlagan fuqaroning ishga joylashishida aks ettiriladi.

Qoʻshimcha maʼlumot uchun veb-saytga havola orqali kiring: ecosys.mehnat.uz