Prezident madaniyat va san’at sohasini rivojlantirish bo‘yicha yangi tashabbuslarni ilgari surdi
2026-06-01 14:40:00 / Vazirlik yangiliklari
Prezident Shavkat Mirziyoyevning madaniyat va san’at xodimlari bilan sohani yanada rivojlantirish bo‘yicha kelgusidagi ustuvor vazifalarga bag‘ishlangan uchrashuvi bo'lib o‘tmoqda.
Tadbirda milliy adabiyotimiz, madaniyat va sanʼatimiz faxri bo‘lgan shoir va yozuvchilar, aktyor, dramaturg va rejissyorlar, qoʻshiqchi, sozanda va kompozitorlar, rassom, haykaltarosh va hunarmandlar, sanʼatshunos olimlar ishtirok etmoqda.
Davlatimiz rahbari mazkur muloqotning maqsadi sohadagi muammolarga yechim topish hamda adabiyot, madaniyat, san’at va kreativ iqtisodiyotda yangi muhit yaratadigan katta tashabbuslarni boshlab berishdan iborat ekanini ta’kidladi.
Sohada iste’dodlarni yuzaga chiqarish va qo‘llab-quvvatlash maqsadida yangi tizim joriy qilinishi qayd etildi:
Endilikda har yili 1 ming nafar shoir va yozuvchilar, madaniyat va san’at vakillari, muzey xodimi va rassomlarga uy-joy olish uchun ipoteka krediti dastlabki to‘lovining 50 foizi qoplab beriladi.
Shuningdek, minglab ijodkorlarning sog‘lig‘ini qo‘llab-quvvatlash maqsadida bepul davolanish, tibbiy sug‘urta va sanatoriy yo‘llanmalari tizimi joriy etiladi.
Xalq artisti, xalq shoiri va xalq yozuvchisi kabi yuksak faxriy unvon sohiblari uchun aeroport va vokzallardagi VIP zallardan bepul foydalanish imkoniyati yaratiladi.
Yosh iste’dodlarni kashf etish, ularni katta sahnalarga olib chiqish va yangi ijodiy loyihalarni qo‘llab-quvvatlash maqsadida “Ijodga investitsiya” jamg‘armasi tashkil etilib, unga har yili 200 milliard so‘m yo‘naltiriladi.
“O‘zbekfilm”ga milliy maqom berilib, mahalliy va xalqaro kinoindustriyaga xizmat ko‘rsatadigan markaziy kinokonsernga aylantiriladi.
Milliy filmlarimizni xalqaro bozorlarga olib chiqish maqsadida global kino platformalari bilan hamkorlik kuchaytiriladi.