“Uz CLAAS Agro” O‘zbekiston-Germaniya qo‘shma korxonasining 15 yilligi nishonlandi
2025-10-01 13:15:00 / Yangiliklar
Tadbirda Qishloq xo‘jaligi vaziri o‘rinbosari Akmal Qosimov, “CLAAS” konserni Kuzatuv kengashi raisi Katrin Klaas Myulxoyzer rahbarligidagi delegatsiya a’zolari va tegishli tashkilot vakillari ishtirok etdi.
So‘zga chiqqan Akmal Qosimov O‘zbekiston qishloq xo‘jaligida zamonaviy texnikalardan foydalanishda kompleks yondashuv muhimligini ta’kidladi. A.Qosimovning ta’kidlashicha, texnikalarni ishlab chiqarish va joriy etish, ulardan samarali foydalana oladigan mutaxassislarni tayyorlash tizimini rivojlantirish davlatimiz oldida turgan ustuvor vazifalardan biridir. Shu nuqtayi nazardan, “Uz CLAAS Agro” bilan hamkorlikni yanada kengaytirish rejalashtirilmoqda.
Ma’lumot uchun, O‘zbekiston Respublikasi Prezidentining 2010-yil 19-martdagi PQ-1304-son qarori asosida tashkil etilgan “Uz CLAAS Agro” MCHJ bugungi kunda mamlakatimizda qishloq xo‘jaligi texnikasini ishlab chiqarish va yetkazib berishda yetakchi korxonalardan biriga aylangan. 14 ta filialida 110 nafardan ortiq malakali mutaxassis mehnat qilmoqda.
O‘tgan 15 yil davomida korxona tomonidan 6100 dan ortiq qishloq xo‘jaligi texnikasi ishlab chiqarilgan. Jumladan:
➖ 2400 dona g‘alla o‘rish kombaynlari,
➖ 3000 dona turli rusumdagi traktorlar,
➖ 700 dona ozuqa tayyorlash texnikalari ishlab chiqarilib, fermer va xo‘jaliklarga yetkazib berilgan.
Yubiley doirasida yangi ishlab chiqarish liniyasi ham ishga tushirildi. Marosim yakunida korxonada fidokorona mehnat qilayotgan xodimlarga faxriy yorliq hamda esdalik sovg‘alari topshirildi.
“Uz CLAAS Agro”ning bugungi yutug‘i — bu nafaqat 15 yillik tarixiy yo‘l, balki kelajakdagi yirik loyihalarga mustahkam zamin yaratishdir.