FAO va O‘zbekiston mutasaddilari yer munosabatlarini takomillashtirish yo‘llarini muhokama qildi
2025-09-25 18:15:00 / Yangiliklar
Bugun Toshkent shahrida BMTning Oziq-ovqat va qishloq xo‘jaligi tashkiloti (FAO) va Qishloq xo‘jaligi vazirligi hamkorligida “Yer kodeksini qayta ko‘rib chiqishga ko‘maklashish” loyihasi doirasida dastlabki maslahat seminari bo‘lib o‘tdi.
Seminarda FAO rahbariyati, Iqtisodiyot va moliya vazirligi, Qishloq xo‘jaligi vazirligi, Suv xo‘jaligi vazirligi, Kadastr agentligi vakillari, xalqaro ekspertlar hamda sohaga aloqador tashkilotlar ishtirok etdi.
Tadbir davomida ta’kidlanganidek, loyiha doirasida qishloq xo‘jaligi yerlarini boshqarish bilan bog‘liq dolzarb masalalarni qamrab oluvchi qator siyosiy eslatmalar FAOning milliy va xalqaro ekspertlari tomonidan ishlab chiqilgan.
Shuningdek, qishloq xo‘jaligi yerlardan samarali foydalanish, yerlarni qayta baholash jarayonida shaffoflikni ta’minlash hamda ularning tabiiy va iqtisodiy xususiyatlarini inobatga olish kabi masalalar muhokama qilindi.
Kunning ikkinchi yarmida esa o‘quv seminari tashkil etilib, unda qishloq xo‘jaligi yerlardan samarali foydalanish, ularni ikkilamchi ijaraga berish va sohaga oid shaffoflikni ta’minlash borasida xorijiy tajriba haqida batafsil ma’lumot berildi.