O‘zbekiston–Janubiy Koreya hamkorligida shirin kartoshka navining yangi yutug‘i
2025-08-02 19:00:00 / Yangiliklar
Koreyaning Seul universiteti olimlari va o‘zbek mutaxassislari bilan hamkorlikda shirin kartoshka — batatning yangi, “chuchuk” navi yaratildi. Mazkur tashabbus Urug‘chilikni rivojlantirish markazi tomonidan ilgari surilib, navni yaratish jarayoniga amaliy ko‘mak ko‘rsatilib kelindi.
Yangi navni yaratishda batatning tabiiy shirinlik beruvchi genlari o‘chirilib, undan serhosil, to‘yimli va mazasi neytral mahsulot olishga erishildi.
Ushbu noyob nav O‘zbekiston iqlim sharoitiga moslashtirilmoqda. Shu bilan birga, yangi kartoshka turi ekologik va agrotexnik sinovlardan o‘tkazilmoqda. Maqsad — uni mamlakatimizda ommaviy yetishtirishga tayyorlash hamda mahalliy fermer va agrotexniklarga innovatsion yechimlar taklif etishdan iborat.
Hozirda mazkur yangi nav Urug‘chilikni rivojlantirish markazining Toshkent viloyatidagi elita urug‘chilik xo‘jaligiga ekilib, dastlabki tajriba-sinov ishlari boshlab yuborilgan. Bu ilm-fan va innovatsiyaning qishloq xo‘jaligidagi muhim yutug‘i sifatida e’tirof etilmoqda.