O‘zbekiston–Xitoy hamkorligida biotexnologik loyiha: qand lavlagidan to innovatsion sanoatgacha
2025-08-01 19:45:00 / Yangiliklar
Muloqot davomida O‘zbekistonda qand lavlagi mahsulotlarini qayta ishlash, shakar ishlab chiqarish va biotexnologik sanoatni rivojlantirish bo‘yicha hamkorlikda amalga oshiriladigan yirik investitsion loyiha yuzasidan fikr almashildi.
Loyihaga ko‘ra, mamlakatning ichki xomashyo resurslarini hisobga olgan holda, yiliga 250 ming tonna qand lavlagini chuqur qayta ishlash quvvatiga ega zamonaviy zavod qurilishi ko‘zda tutilgan.
Ushbu korxona nafaqat ichki bozorni sifatli shakar mahsulotlari bilan ta’minlashga, balki qo‘shni mamlakatlarga eksportni yo‘lga qo‘yishga xizmat qiladi. Shu bilan birga, biotexnologik yo‘nalishlarni O‘zbekistonga joriy etish orqali nafaqat sanoat, balki ilmiy-texnik salohiyat ham oshirilishi rejalashtirilgan.
Tashabbus doirasida yuqori qo‘shimcha qiymatga ega mahsulotlar ishlab chiqarish, xususan, bioetanol, organik o‘g‘itlar va hayvonlar uchun ozuqaviy qo‘shimchalarni tayyorlash imkoniyatlari ham ko‘rib chiqilmoqda.
Mazkur loyiha qishloq xo‘jaligi va oziq-ovqat sanoatining chuqur integratsiyasini ta’minlab, qishloq hududlarida barqaror bandlik yaratish, mahalliy fermerlar uchun yangi bozorlar ochish va yuqori texnologiyalarga asoslangan ishlab chiqarish madaniyatini shakllantirishga xizmat qiladi.
Uchrashuv yakunida tomonlar texnik-iqtisodiy asoslarni ishlab chiqish va loyihani bosqichma-bosqich amalga oshirish yuzasidan amaliy harakatlarni boshlashga kelishib oldilar.