O‘zbekistonda Eron tajribasi asosida qishloq xo‘jaligi texnikasi ishlab chiqarilishi yo‘lga qo‘yilmoqda
2025-07-25 15:10:00 / Yangiliklar
Tashrif davomida ikki tomonlama hamkorlikni mustahkamlashga qaratilgan qator kelishuvlarga erishilgan. Xususan, Eron Qishloq xo‘jaligi texnikasi ishlab chiqaruvchilar uyushmasi bilan qishloq xoʻjaligini mexanizatsiyalash va texnologik hamkorlikni kengaytirish bo‘yicha memorandum imzolangan. Mazkur kelishuv ijrosini ta'minlash borasida amaliy ishlar boshlab yuborildi.
Xususan, joriy yilning 24-iyul sanasida Eronning “Fattahi Agricultural Machinery Company” kompaniyasi vakillari bilan O‘zbekiston Respublikasi Ichki ishlar vazirligi Jazoni ijro etish departamenti huzuridagi Olmaliq shahrida joylashgan 14-sonli jazoni ijro etish koloniyasida uchrashuv bo‘lib o‘tdi.
Uchrashuv chog‘ida eronlik mutaxassislar qishloq xo‘jaligi texnikasini ishlab chiqarish loyihasi bo‘yicha o‘z biznes-rejalarini taqdim etdi. Shuningdek, muassasa hududida joylashgan ishlab chiqarish binolari ko‘zdan kechirildi va hamkorlikning tashkiliy va texnik jihatlari muhokama qilindi.
Muzokaralar yakunida tomonlar o‘rtasida qishloq xo‘jaligi texnikasini mahalliylashtirish loyihasini amalga oshirish bo‘yicha shartnoma imzolandi. Kelishuvga ko‘ra, loyiha doirasida birinchi bosqichda 3 million AQSH dollari miqdorida investitsiya jalb qilinadi.
Mazkur loyiha mamlakatda qishloq xo‘jaligi texnikasi ishlab chiqarish salohiyatini oshirish, xorijiy texnikalarga qaramlikni kamaytirish hamda zamonaviy agrotexnologiyalarni amaliyotga joriy etishga xizmat qilishi kutilmoqda.
Tegishli texnik tayyorgarlikdan so‘ng, korxonada turli turdagi qishloq xo‘jaligi texnikalari ishlab chiqarilishi rejalashtirilmoqda.
Hozircha loyihaning birinchi bosqichi boshlangan bo‘lsa-da, kelgusida ishlab chiqarish hajmini oshirish, mahsulotni ichki bozorga yetkazish va eksport imkoniyatlarini ham ko‘zda tutilgan.