O‘zbekiston Respublikasi Qishloq хo‘jаligi vаzirligi

Mazkur seminarning asosiy maqsadi – paxtachilik sohasida olib borilayotgan agrotexnik tadbirlar samaradorligini oshirish, ilg‘or tajribalarni joyida o‘rganish hamda fermerlar va ishlab chiqaruvchilar bilan ochiq muloqot qilish orqali mavjud muammolarga amaliy yechim topishdan iborat bo‘ldi.

Dastlabki bosqichda paxta dalalarida amalga oshirilayotgan oziqlantirish, begona o‘tlarga qarshi kurashish, zararkunandalarga nisbatan kimyoviy va biologik usullarda ishlov berish bo‘yicha amaliy tahlil va muhokamalar olib borildi. Tolali ekinlar ilmiy-tadqiqot instituti direktori Tohir Kuliyev tomonidan paxta hosilini qabul qilish jarayonida joriy etilgan yangicha yondashuvlar yuzasidan taqdimot o‘tkazildi.

Seminarda alohida urg‘u berilgan masala — “Agrotarozi” axborot tizimi bo‘ldi. Qishloq xo‘jaligi vazirligi Boshqarma boshlig‘i Bahodir Rahimov tizimning ishlash prinsiplari, ishtirokchilarning roli va undagi shaffoflik mexanizmlari haqida atroflicha ma’lumot berdi.

Agrotarozi — sun’iy intellekt asosida ishlaydigan avtomatlashtirilgan tizim bo‘lib, paxta yuklarining kirib kelishi va chiqib ketishi, tortilishi va qayd etilishi kabi barcha jarayonlar inson omilini minimallashtirgan holda boshqariladi. Bu esa korrupsion xatarlarning oldini olish, ishonchli va shaffof hisob-kitob yuritish, fermer va ishlab chiqaruvchilar manfaatlarini himoya qilish imkonini beradi.

Tizimni samarali joriy etish maqsadida Qishloq xo‘jaligi vazirligi tomonidan “Agrotarozi” bo‘yicha maxsus o‘quv dasturlari ishlab chiqilgan bo'lib onlayn va oflayn tartibda olib boriladi.

Mazkur o‘quvlar orqali foydalanuvchilar “Agrotarozi” tizimining texnik imkoniyatlari, real vaqt monitoringi, hisobdorlik tizimi hamda statistik tahlillarni yuritish mexanizmlari bilan chuqur tanishadilar.

Seminar davomida vazir Ibrohim Abdurahmonov “Agrotarozi” axborot tizimi haqida to‘xtalib o‘tib, ushbu zamonaviy raqamli yechim paxta qabul qilish jarayonida shaffoflikni ta’minlash, inson omilini kamaytirish va hisob-kitoblarda aniqlikni oshirishda muhim vositaga aylanganini ta’kidladi. U, shuningdek, tizim orqali barcha yuk harakati — daladan qabul punktigacha bo‘lgan bosqichlar to‘liq avtomatlashtirilganini, bu esa fermerlar va ishlab chiqaruvchilar manfaatlarini ishonchli himoya qilishga xizmat qilishini alohida qayd etdi.

Samarqandda o‘tkazilgan ochiq muloqot va amaliy seminar — paxtachilikda raqamlashtirish, ilm-fan va amaliyot uyg‘unligi, shaffof va samarali boshqaruv tizimiga o‘tish yo‘lida qo‘yilgan muhim qadam bo‘ldi. Ayniqsa, “Agrotarozi” tizimi orqali sohaga aniqlik, adolat va ishonch tamoyillari tobora chuqur singib bormoqda.