O‘zbekiston Respublikasi Qishloq хo‘jаligi vаzirligi

Umumiy maydoni 50 gektarni tashkil etuvchi mazkur dalalarda hozirda g‘o‘zaning xorijiy — “Xin Lu Zao-57” navi Xitoy agrotexnologiyasi asosida parvarish qilinmoqda.

Mutasaddilarning ma’lumotiga ko‘ra, har bir gektarga 240 ming dona ko‘chat joylashtirilgan bo‘lib, navlar 76x10 sxema asosida, qo‘shqator usulda va plyonka ostida ekilgan. Mazkur ko‘chatlar hozirgi kunda sifatli va barqaror rivojlanmoqda.

E’tiborga molik jihati shundaki, mazkur nav nafaqat ko‘sak qurti, balki gerbitsidlarga — ya’ni begona o‘tlarni yo‘q qilishda qo‘llaniladigan kimyoviy vositalarga ham yuqori darajada chidamliligi bilan ajralib turadi. Bu esa unga bo‘lgan talabning ortib borishiga sabab bo‘lmoqda.

Paxta yetishtirish jarayoni zamonaviy, intensiv texnologiyalar asosida tashkil etilgan. Chopiq ishlari, qator oralariga ishlov berish va tomchilatib sug‘orish kabi barcha agrotexnik tadbirlar innovatsion yondashuvlar asosida amalga oshirilmoqda.

Ma’lum qilinishicha, g‘o‘za navlari hozirda barqaror va talabga javob beradigan darajada rivojlanmoqda. Parvarishlash jarayonida qo‘llanilayotgan barcha agrotexnik amaliyotlar Paxtachilik kengashi olimlari tomonidan ishlab chiqilgan ilmiy-uslubiy qo‘llanmalarga muvofiq amalga oshirilmoqda.

Vazir Ibrohim Abdurahmonov olib borilayotgan ishlar bilan tanishar ekan, g‘o‘za navlarining belgilangan muddatda to‘liq yetilishini ta’minlash muhimligini ta’kidladi. Shuningdek, hosildorlikni oshirish, oziqlantirish tizimini takomillashtirish va barcha jarayonlarda ilmiy yondashuvga asoslangan tizimli ishlarni davom ettirish lozimligini qayd etdi.