Toshkent davlat agrar universitetida bitiruvchilarga tantanali diplom topshirish marosimi bo‘lib o‘tdi
2025-07-15 15:10:00 / Yangiliklar
Tadbir bitiruvchilar uchun nafaqat rasmiy marosim, balki ularning ilk kasbiy qadamlari yo‘lida yo‘lboshchi bo‘ladigan ezgu tilaklar, ruhlantiruvchi chiqishlar va amaliy maslahatlarga boy unutilmas voqea sifatida tarixda muhrlandi.
Ma’lumotlarga ko‘ra, joriy o‘quv yili davomida universitetning 36 ta bakalavriat ta’lim yo‘nalishi va 14 ta magistratura mutaxassisligi bo‘yicha jami 2 491 nafar talaba ta’limni muvaffaqiyatli tamomladi. Shundan 2 470 nafari bakalavr, 21 nafari esa magistr darajasini oldi. Quvonarlisi, 9 nafar bitiruvchi o‘zining bilim va faolligi bilan imtiyozli diplomga sazovor bo‘ldi.
Universitet bitiruvchilarining kasbiy yo‘lini qo‘llab-quvvatlash, ularni mehnat bozoriga muvaffaqiyatli integratsiya qilish bugungi kunning ustuvor vazifalaridan biri sanaladi. Shu maqsadda oliy ta’lim muassasasi tomonidan 200 dan ortiq ishlab chiqarish, xizmat ko‘rsatish va ilmiy-tadqiqot tashkilotlari bilan amaliy hamkorlik yo‘lga qo‘yilgan. Talabalar o‘qish davomida bevosita korxonalarda amaliyot o‘tash orqali o‘z kasbiy yo‘nalishlari bo‘yicha zarur tajribaga ega bo‘lishmoqda.
Yoshlarning bilim va ko‘nikmalarini xalqaro darajada mustahkamlash maqsadida universitet tomonidan xorijiy hamkorlik aloqalari kengaytirilmoqda. Jumladan, 2025 yilda 187 nafar talaba qisqa muddatli, haq to‘lanadigan o‘quv-amaliyot dasturlari doirasida xorijiy davlatlarga yuborildi. Xususan, 46 nafar talaba Polshada, 121 nafari Germaniyada, 20 nafari esa Bolgariyada o‘z kasbiy bilim va ko‘nikmalarini boyitib qaytdilar.
Toshkent davlat agrar universiteti yoshlarga zamonaviy bilim va ko‘nikmalarni berish, ularning salohiyatini to‘laqonli namoyon etishlari uchun barcha zarur shart-sharoitlarni yaratib bermoqda. Bugungi bitiruvchilar nafaqat malakali mutaxassislar, balki mamlakat agrar salohiyatining yuksalishiga o‘z hissasini qo‘shadigan fidoyi yosh kadrlardir.
Tadbir so‘ngida universitet rahbariyati va mehmonlar bitiruvchilarni chin dildan tabriklab, ularga kelgusi faoliyatlarida omad, bardavom muvaffaqiyat va porloq kelajak tiladilar. “Sizlar – ertangi kunning ishonchli mutaxassislari, yurtimiz agrar sohasini yangi bosqichga olib chiquvchi yosh kadrlarsiz!” degan so‘zlar barcha bitiruvchilar qalbida faxr va mas’uliyat tuyg‘usini yanada mustahkamladi.