O‘zbekiston va Germaniya hamkorligida iqlim xavfini boshqarish bo‘yicha yangi bosqich
2025-07-14 12:45:00 / Yangiliklar
Mazkur hamkorlik Germaniya Iqtisodiy hamkorlik va taraqqiyot federal vazirligi (BMZ) tomonidan moliyalashtirilayotgan mintaqaviy loyiha doirasida amalga oshirilmoqda. 2022-yilda boshlangan loyiha 2028-yilgacha davom etadi.
Memorandumning asosiy maqsadi — Markaziy Osiyo mintaqasida iqlim va tabiiy ofat xavflarini kamaytirish, shuningdek, transchegaraviy suv resurslarini boshqarish bo‘yicha ilmiy-amaliy salohiyatni kuchaytirishdan iborat.
Tomonlar Navoiy viloyatining Zarafshon daryosi havzasida zamonaviy, innovatsion texnologiyalarni, jumladan, aqlli tomchilatib sug‘orish tizimlarini joriy etish orqali qishloq xo‘jaligini modernizatsiya qilishga kelishib oldilar.
Akademik M. Mirzayev nomidagi institut tomonidan 2025-yil yakuniga qadar institut tarkibidagi Navoiy ilmiy-tajriba stansiyasiga qarashli 10 gektar yer maydonida intensiv bog‘ barpo etiladi hamda mazkur bog‘da tomchilatib sug‘orish tizimi joriy qilinadi.
Loyiha quyidagi maqsadlarni o‘z ichiga oladi:
– suv resurslaridan oqilona foydalanish;
– qurg‘oqchil yillarda hosildorlikni saqlab qolish;
– ekologik muvozanatni ta’minlash;
– agrosanoat samaradorligini oshirish.
Uzoq muddatli istiqbolda ushbu tizimlar boshqa hududlarga ham model sifatida joriy etilishi rejalashtirilgan.
Ushbu memorandum O‘zbekiston va Germaniya o‘rtasidagi uzoq yillik samarali hamkorlikning yana bir amaliy namunasi bo‘lib, iqlim o‘zgarishlariga qarshi kurashda yangi bosqichni boshlab beradi.