O‘zbekiston-Xitoy: agrodronlar bo‘yicha yangi loyiha muhokama qilindi
2025-07-08 18:05:00 / Yangiliklar
Uchrashuv avvalida vazir o‘rinbosari Xitoy bilan ikki tomonlama aloqalar izchil rivojlanayotganini, xususan, urug‘chilik va raqamlashtirish sohalarida samarali loyihalar yo‘lga qo‘yilganini ta’kidladi.
2015-yilda Gonkongda tashkil etilgan “Skyworks” kompaniyasi Xitoyning yetakchi texnologik investorlaridan biri hisoblanadi. Kompaniya dronlar ishlab chiqarish, ularni o‘qitish va amaliyotda qo‘llash bo‘yicha kompleks yechimlarni taklif etadi. Shu bilan birga, kompaniya Pekin aerokosmik universiteti hamda 40 dan ortiq ilmiy-tadqiqot muassasalari bilan hamkorlik qiladi.
Muloqot davomida tomonlar qator yo‘nalishlar bo‘yicha hamkorlik qilish takliflarini ilgari surdi. Jumladan, O‘zbekistonda dron ishlab chiqarish sanoatini rivojlantirish, sohaga oid qonunchilikni takomillashtirish, kadrlar tayyorlash va malaka baholash tizimini joriy etish kabi masalalar ko‘rib chiqildi.
Uchrashuv yakunida tomonlar bildirilgan takliflarni chuqur tahlil qilib, yaqin kelajakda amalga oshiriladigan hamkorlik yo‘nalishlarini belgilash va aniq takliflar paketini ishlab chiqishga kelishib oldilar.