O‘zbekiston Respublikasi Qishloq хo‘jаligi vаzirligi

Tashrif davomida vazir markazda Golshtin, Simmental, Limuzin, Angus kabi yirik shoxli qoramollarning yetti zotini boqish, ularni mahalliy iqlim va ekologik sharoitlarga moslashtirish bo‘yicha olib borilayotgan ishlarni ko‘zdan kechirdi. Bugungi kunda markaz mutaxassislari mazkur zotlarni o‘zaro chatishtirish orqali Qoraqalpog‘iston hududining qattiq iqlimiga mos, yuqori mahsuldorlikka ega bo‘lgan yangi gibrid zotlarni yaratish ustida ilmiy izlanishlar olib bormoqda.

Ma’lumki, so‘nggi yillarda mamlakatimiz agrar sohasining ustuvor yo‘nalishlaridan biri sifatida zotli qoramollar sonini ko‘paytirish, go‘sht va sut mahsuldorligini oshirish masalalariga alohida e’tibor qaratilmoqda. Xususan, Qoraqalpog‘iston filialida zamonaviy in-vitro laboratoriya tashkil etilib, unda sun’iy urug‘lantirish, zamonaviy seleksiya va genetik monitoring ishlari ilg‘or texnologiyalar asosida olib borilmoqda.

Ibrohim Abdurahmonov tashrif chog‘ida laboratoriya sharoitlari bilan tanishib, mutaxassislarga qator amaliy tavsiyalar berdi. Jumladan, urug‘larning hayotchanligini oshirish va yuqori natijadorlikka erishish uchun laboratoriya muhitidagi haroratning doimiy barqarorligini ta’minlash zarurligi ta’kidlandi. Bu, o‘z navbatida, nafaqat urug‘ sifati, balki kelajakda yuqori mahsuldorlik ko‘rsatadigan boqiy zotlarning shakllanishiga ham bevosita ta’sir ko‘rsatadi.

Shuningdek, vazir inkubatsiya jarayonida tashqi muhit omillarining salbiy ta’sirini cheklash, xodimlarning laboratoriyaga kirib chiqishi ustidan qat’iy nazorat o‘rnatish, chang va bakterial aralashmalarni minimallashtirish, germetik himoya vositalarini kuchaytirish zarurligini alohida qayd etdi. Chunki sanitariya-gigiyena talablariga qat’iy rioya etilmasligi seleksiya jarayonining natijalariga salbiy ta’sir ko‘rsatishi mumkin.

Bugungi kunda Naslchilik markazining Qoraqalpog‘iston filiali nafaqat mahalliy ekologik sharoitlarga moslashgan, balki yuqori chidamlilik va mahsuldorlikka ega qoramol zotlarini yaratishda muhim ilmiy maktabga aylanib bormoqda. Bu esa nafaqat Qoraqalpog‘iston, balki mamlakatimiz miqyosida go‘sht va sut mahsulotlari ishlab chiqarishni oshirish, ichki bozor ehtiyojini to‘liq qondirish va eksport salohiyatini mustahkamlash imkonini beradi.

Qisqacha aytganda, Qoraqalpog‘istonda ilmiy asoslangan seleksiya va zamonaviy naslchilik jarayonlarining yangi bosqichi nafaqat chorvachilik sohasining barqaror rivojlanishi, balki mintaqaning oziq-ovqat xavfsizligini ta’minlashda ham muhim omil bo‘lmoqda.