O‘zbekiston Respublikasi Qishloq хo‘jаligi vаzirligi

Tashrif doirasida vazir “Intertreid holding” MChJga qarashli, umumiy maydoni 10 gektarni tashkil etuvchi zamonaviy issiqxonani ko‘zdan kechirdi. Ushbu issiqxonada 4-avlod Gollandiya texnologiyasi asosida yuqori hosildor pomidor navlari yetishtirilmoqda. Mas’ullarning ma’lumot berishicha, yetishtirilayotgan mahsulotlarning barchasi eksportga yo‘naltirilgan bo‘lib, issiqxona to‘liq zamonaviy agrotexnik talablarga javob beradi.

Ibrohim Abdurahmonov amalga oshirilayotgan ishlarni ijobiy baholadi hamda mahsulot turlarini ko‘paytirish, eksport hajmini oshirish va resurs tejamkor sug‘orish texnologiyalarini yanada kengaytirish bo‘yicha tegishli ko‘rsatmalar berdi.

Shuningdek, vazir Quyi Chirchiq tumanidagi “Qoyunchilik, naslchilik agrokompleksi” MChJ faoliyati bilan tanishdi. Maydoni 11 gektarni tashkil etuvchi mazkur majmua 27 ta texnologik blokdan iborat bo‘lib, hozirda bu yerda 120 ming bosh quyon parvarish qilinmoqda. Korxonada quyon yetishtirishdan tortib tayyor go‘sht mahsulotini qadoqlashgacha bo‘lgan to‘liq ishlab chiqarish zanjiri yo‘lga qo‘yilgan.

Majmuada yiliga o‘rtacha 2 ming tonna tayyor go‘sht yetishtiriladi. Tayyor mahsulotlarning asosiy qismi Rossiya va Belarusga eksport qilinadi. Shuningdek, korxona “Halol” sertifikatiga ega bo‘lgani bois mahsulotlarga Sharq mamlakatlarida ham yuqori talab mavjud.

Yana bir muhim jihati shuki, agrokompleksda zamonaviy laboratoriyalar tashkil etilgan bo‘lib, u yerda italiyalik mutaxassislar bilan hamkorlikda quyonlarning genetik sifati, sog‘ligi va zotlilik darajasini yaxshilash bo‘yicha ilmiy tadqiqotlar olib borilmoqda.

Vazir mazkur tajribani yuqori baholab, Toshkent davlat agrar universiteti bilan qo‘shma ilmiy-amaliy loyihani yo‘lga qo‘yishni taklif etdi. Ushbu tashabbus orqali talabalar majmua laboratoriyalarida amaliy ko‘nikmalar orttirish, ilmiy tadqiqotlar olib borish va zamonaviy genetika yo‘nalishida faol ishtirok etish imkoniga ega bo‘ladi.

Tomonlar qisqa muddat ichida loyiha doirasida tashkiliy ishlarni boshlab, uni bosqichma-bosqich amaliyotga joriy etishga kelishib oldilar.