O‘zbekiston Respublikasi Qishloq хo‘jаligi vаzirligi

Poytaxtimizning Sergeli tumanidagi ana shunday yoshlardan iborat guruh Qishloq xo‘jaligi vazirligi va uning tizim tashkilotlariga biriktirilgan bo‘lib, ularni oilaviy ahvoli, qiziqishlari va ehtiyojlaridan kelib chiqib, kasb-hunarga yo‘naltirish va bandligini ta’minlash bo‘yicha ishlar olib borilmoqda.

Uchrashuv davomida Eshmirza Abdualimov har bir yosh bilan alohida suhbatlashib, ularning ijtimoiy ahvoli, oilaviy sharoiti, qiziqishlari va mutaxassisligi haqida batafsil ma’lumot oldi. Shuningdek, vazirlik mas’ullari va hokim yordamchilari ishtirokida yoshlarning bandligini ta’minlash, kasb-hunar o‘rganishi uchun zarur choralar ko‘rilishi, mavjud imkoniyatlardan samarali foydalanish masalalari joyida muhokama qilindi.

Ta’kidlash lozimki, mamlakatimizda yoshlarning bandligini ta’minlash, ularning bilim va salohiyatini ro‘yobga chiqarish davlat siyosatining ustuvor yo‘nalishiga aylangan. Hududlarda manzilli ro‘yxatlar shakllantirilib, yoshlar uchun yer maydonlari ajratib berilmoqda, urug‘ va ko‘chatlar yetkazib berish, tayyor mahsulotni eksport qilish uchun zarur infratuzilma yaratilmoqda. Natijada, ayniqsa, agrar sohada o‘z daromadini oshirib, mustaqil faoliyat boshlagan yoshlar soni ortib bormoqda.

“Sultonobod” mahallasidagi uchrashuvda IT sohasi mutaxassisligi bor yoshlarni “Agrosanoatni raqamlashtirish markazi”da ish o‘rganishga jalb qilish topshirig‘i berildi. Oliy ta’lim olish istagini bildirgan yoshlarga esa Toshkent davlat agrar universitetida o‘qish imkoniyatlarini yaratish yuzasidan mutasaddilarga aniq vazifalar yuklatildi.

Aholining asosan hovlilarda yashashini hisobga olib, o‘z tomorqalaridan samarali foydalanish, kichik maydonlarda agrobiznesni yo‘lga qo‘yish, zarur mini texnikalar va mavjud imtiyozlar haqida ham batafsil tushuntirishlar berildi.

Bu kabi tashabbuslar yoshlarni ish bilan ta’minlash va ularni jamiyat hayotida faol ishtirok etishga undash orqali ijtimoiy barqarorlikni mustahkamlashga xizmat qilmoqda.