Yaponiya olimlari zanjabilning saraton kasalligiga qarshi samarali ta’sirini aniqladi
2025-06-16 13:30:00 / Yangiliklar
Xususan, “kenkuro zanjabili” nomli o‘simlik tarkibida mavjud bo‘lgan etil-p-metoksitsinnamat nomli faol birikma saraton hujayralarining lipid metabolizmini buzishi orqali ularni nobud qilishga olib keladi.
Tadqiqot davomida ma’lum bo‘ldiki, bu modda saraton hujayralarida yog‘ sintezini izdan chiqaradi. Bu esa hujayralarning asosiy energiya manbasi bo‘lgan ATP ishlab chiqarish tizimida tanqislikni yuzaga keltiradi. Natijada hujayralar energetik inqirozga uchrab, o‘z-o‘zini yo‘q qilish (apoptoz) jarayoniga kiradi.
Ilmiy guruh dastlab bu moddaning bevosita hujayralarni o‘ldiruvchi ta’sir ko‘rsatishini taxmin qilgan edi. Biroq, keyingi bosqichlarda ularning metabolik mexanizmlar orqali saraton hujayralarini zaiflashtirib, ularni osonroq yo‘q qilish imkoniyatini yaratishi aniqlangan. Bu esa moddaning organizmga nisbatan kamroq toksik ta’sir ko‘rsatish ehtimolini oshiradi.
Yaponiya Milliy Onkologiya markazi vakillari bu topilmani kelajakda tabiiy moddalarga asoslangan yangi avlod dori vositalarini ishlab chiqish uchun asos deb baholamoqda. Shu bilan birga, ushbu faol moddaga asoslangan eksperimental dorilar ustida klinikoldi tadqiqotlar boshlangan. Agar bu natijalar klinik tajribalarda ham tasdiqlansa, zanjabil ekstraktidan olingan dorilar ko‘krak, jigar va yo‘g‘on ichak saratonlariga qarshi kurashda qo‘llanilishi mumkin bo‘ladi.
Shuningdek, olimlar ushbu moddaning yallig‘lanishga qarshi, antioksidant va immun tizimini kuchaytiruvchi xususiyatlari tufayli boshqa kasalliklar, jumladan, surunkali yallig‘lanish, semizlik va diabet kabi kasalliklarga qarshi ham foydali bo‘lishi mumkinligini aytishmoqda.