O‘zbekiston Respublikasi Qishloq хo‘jаligi vаzirligi

Mazkur muhim tadbir O‘zbekiston Respublikasi Qishloq xo‘jaligi vazirligi hamda Jahon banki hamkorligida tashkil etilmoqda.

Unda Qishloq xo‘jaligi vazirligi rahbariyati, sohaga oid oliy ta’lim va ilmiy-tadqiqot muassasalari vakillari, Jahon banki mutaxassislari, xalqaro tashkilotlar vakillari, yetakchi xorijiy ekspertlar va ilmiy doira vakillari ishtirok etmoqda.

Seminar-trening doirasida iqlim o‘zgarishi sharoitida qishloq xo‘jaligini barqaror rivojlantirish, ekologik tahdidlarni yumshatish, ayniqsa Orolbo‘yi kabi ekologik nozik hududlarda ilg‘or texnologiyalar asosida yechim topish masalalari yuzasidan fikr almashilmoqda.

Tadbir doirasida xalqaro tajribalar, innovatsion yondashuvlar, ilm-fan yutuqlariga asoslangan amaliy yechimlar muhokama qilinmoqda. Orolbo‘yi mintaqasida barqaror agrar siyosat yuritish va iqlimga moslashuvchan qishloq xo‘jaligi mexanizmlarini joriy etish masalalari markaziy o‘rinni egallamoqda.

Seminar-trening ertaga ham davom etadi. Dastur doirasida ishtirokchilarning Mo‘ynoq shahriga tashrifi va Orolbo‘yi hududida olib borilayotgan amaliy ishlar bilan yaqindan tanishuvi ham rejalashtirilgan.

Bu esa ushbu mintaqadagi ekologik holatni yaxshilashga qaratilgan tashabbuslarning joyida ko‘rib chiqilishiga xizmat qiladi.